काठमाडौं । ‘सेभ द नेशन मुभमेन्ट’ ले देशको रक्षाका लागि आफ्नो अभियानलाई अघि बढाउँदै लगेको छ । अभियानले पछिल्लो समयमा विभिन्न जिल्लामा गएर अन्तरक्रिया र छलफल गर्दै आएको छ । मुभमेन्टका संयोजक काशिराम गुरुङ (प्रसाद) ले अभियान सार्थक बन्दै गएको बताए । ‘हामी जहाँ पुगेर कार्यक्रम गर्छौ त्यहाँ उत्साह पाएका छौं, देशलाई संकट परेको बेला कोही पनि चुप लागेर बस्नु हुँदैन भन्ने हाम्रो मान्यता हो’ संयोजक गुरुङले भने ‘हामी कसैको विरुद्धमा होइनौं, देशको रक्षाका लागि यो अभियान चलाएका हौं, अहिले राम्रो समर्थन पाएका छौं ।’ गुरुङले १ सय १ जनाको केन्द्रीय कमिटी बनाउने र देशव्यापीरुपमा सामाजिक सचेतनामूलक अभियान चलाउने जनाएका छन् । अहिले केन्द्रीय समितिमा ४९ जना रहेका छन् । केही दिन मै सातवटै प्रदेशमा प्रदेश समिति पनि बनाउने योजना रहेको उनको भनाई छ । मुभमेन्टले वर्तमान राजनीतिक दलहरु असफल भएको निष्कर्ष निकालेको छ । संयोजक गुरुङले मुभमेन्टले आगामी दिनमा गर्ने कार्यक्रमको खाका समेत प्रस्तुत गरिसकेका छन् । उनले मुभमेन्टको माध्यमबाट मानिसहरुलाई रोजगार दिने र आर्थिक सामाजिक रुपमा उनीहरुलाई सबल बनाउने बताउँदै आएका छन् ।