रक्तदान जीवनदान हो : नगरप्रमुख दीपक रिजाल

अंकध्वज मोते

काठमाडौं। गोकर्णेश्वर इसाई समाजको आयोजनामा आइतबार गोकर्णेश्वर नगरपालिका–स्थित किरात चोकको होसन्ना मण्डलीमा खुला रक्तदान कार्यक्रम सम्पन्न भएको छ। कार्यक्रममा छिमेकी मण्डलीहरूबाट आएका सहभागीहरूले उत्साहपूर्वक रक्तदान गरेका थिए।

कार्यक्रमका प्रमुख अतिथि गोकर्णेश्वर नगरपालिकाका नगरप्रमुख दीपक रिजालले रक्तदानजस्तो मानवीय र सामाजिक सेवाको आयोजना गरेकोमा गोकर्णेश्वर इसाई समाजलाई धन्यवाद व्यक्त गरे। उनले रक्तदानलाई जीवनदानको संज्ञा दिँदै यस्ता सेवामूलक कार्यक्रम समाजका लागि अत्यन्त आवश्यक रहेको बताए।

नगरप्रमुख रिजालले गोकर्णेश्वर नगरपालिकाका बासिन्दालाई रगतको आवश्यकता पर्दा निःशुल्क रगत उपलब्ध गराउँदै आएको जानकारी दिँदै रक्तदान कार्यक्रमले बिरामीको जीवन बचाउन महत्त्वपूर्ण योगदान पुर्‍याउने बताए। उनले यस्ता मानवीय कार्यलाई निरन्तरता दिन सबैलाई आग्रह गर्दै कार्यक्रमको सफलताका लागि शुभकामनासमेत व्यक्त गरे।

उक्त कार्यक्रममा मेडिकल कलेजको पनि सहभागिता रहेको थियो। छिमेकी मण्डलीहरूबाट आएका रक्तदाताहरूले रक्तदानमार्फत मानवीय सेवामा योगदान पुर्‍याएका थिए।

कार्यक्रममा सहभागी रक्तदाताहरूलाई उत्साह प्रदान गर्ने उद्देश्यले देव श्रेष्ठले वचनमार्फत प्रेरणादायी सन्देश दिएका थिए। उनले सेवाभाव, आपसी सहयोग र मानवीय उत्तरदायित्वको महत्त्वबारे प्रकाश पारेका थिए।

रक्तदानजस्तो जीवनरक्षक कार्यमार्फत समाजमा सहयोग, सद्भाव र सेवाको भावना अभिवृद्धि गर्ने उद्देश्यले कार्यक्रम आयोजना गरिएको आयोजकले जनाएको छ। यस्ता कार्यक्रमले रगतको अभावमा रहेका बिरामीलाई सहयोग पुग्नुका साथै सामाजिक एकता र मानवीय सेवाको भावनालाई समेत बलियो बनाउने विश्वास गरिएको छ।

“रक्तदान गरौँ, जीवन बचाऔँ” भन्ने सन्देशका साथ सम्पन्न कार्यक्रमले समुदायमा मानवीय सेवाप्रतिको जिम्मेवारी र सामाजिक सद्भावको महत्त्व उजागर गरेको छ।