काठमाडौं । राष्ट्रिय प्रजातन्त्र पार्टी (राप्रपा) मा राजेन्द्रप्रसाद लिङ्देनले अध्यक्षको उम्मेदवारी घोषणा गरेका छन् । काठमाडौंमा आयोजित पत्रकार सम्मेलनमा उनले आफू स्वाभाविक रुपमा अध्यक्षको दाबेदार भएको बताए ।
‘कसैकसैले अध्यक्ष हुने बेला भएको छैन पनि भने तर म अध्यक्ष चलाउन योग्य भइसकेकाले नै आँट गरेको हुँ’ उनले भने ‘ म हरेक कुराले अरुभन्दा कम छैन, पार्टीलाई कस्तो बनाउनुपर्छ भन्ने मलाई थाहा छ, कि अघि बढ्नप¥यो कि पार्टी सकिएको हेरेर बस्नुप¥यो ।’ कार्यक्रममा उनले अहिलेसम्म पार्टीमा बसेर गरेका कामको बारेमा जानकारी दिएका थिए । उनले अहिले भइरहेका अध्यक्षत्रयबाट पार्टी चल्न नसक्ने ठोकुवा गरे । उनले आफ्नो उम्मेदवारी कसैका विरुद्धमा नभएको र राप्रपाको पक्षमा भएको समेत स्पष्ट पारे । उनले अहिलेसम्म पार्टी कसका कारण कमजोर बन्यो र यो अवस्थामा आइपुग्यो भन्ने गम्भीर समीक्षा गर्नुपर्ने बेला भएको बताए । उनले पार्टीलाई गतिशील बनाउन युवालाई पार्टीमा उचित स्थान दिएर नेतृत्वमा ल्याउने बताएका छन् । उनले राप्रपालाई भोलिको दिनमा अवसर र चुनौती दुवै आएकाले ती सबैलाई सम्बोधन गर्न सक्ने शक्ति आफूसँग भएको जनाएका छन् ।
‘अहिलेसम्म हेरेर र पर्खेर बसेकै हुँ, अब पार्टी संकटमा परेपछि कैंची लाउन बाध्य भएँ’ उनले गर्भवती महिलाको उदाहरण दिँदै भने ‘ महिला गर्भवती भइन्, बच्चा जन्मने बेला पनि बित्यो तर बच्चा नजन्मेपछि डाक्टरले कैंची चलाएर बच्चा निकालेर आमा र बच्चा स्वस्थ्य भएजस्तै पार्टीलाई राम्रो बनाउन कैची चलाएको हुँ ।’ उनले बच्चा जन्मेपछि आमालाई पनि पीँडा कम हुने भन्दै आफूले पार्टीभित्रको असहज पीडा कम गर्न उम्मेदवारी दिएको स्पष्ट पारे । अध्यक्षद्धय कमल थापाले मकवानपुर १ र अर्का अध्यक्ष पशुपति शमशेर राणाले सिन्धुपाल्चोक २ बाट प्रतिनिधिसभाको यो निर्वाचन हार्दा पनि लिङ्देनले झापा ३ बाट जितेका हुन् । राप्रपाको तर्फबाट प्रतिनिधिसभामा उनी एक्लो सांसद हुन् । उनले आवश्यक परेमा अवस्था हेरेर भोलि अरु पार्टीसँग चुनावी र राजनीतिक सहकार्य गर्न सकिने बताउँछन् । उनले पहिलो एजेण्डा भनेको पार्टी एक्लै लड्ने र उत्कृष्ट नतिजा ल्याउने लक्ष्य रहेको बताए । उनले निर्वाचनपछि राप्रपाले सरकार चलाउने सम्भावना भएमा पनि अरुभन्दा उदाहरणीय बनाउने ठोकुवा गरे । धेरै नेता तथा कार्यकर्ता र शुभचिन्तकका साथमा अध्यक्षको उम्मेदवारी घोषणा गर्दै उनले पार्टी चलाउनका लागि कसैसँग पैसा माग्नु नपर्ने दाबी गरे । ‘पार्टी चलाउन र घुमडुल गर्न कसैसँग हात फैलाउनु पर्दैैन, पैसाको अभावमा पार्टी गतिविधि सुस्त हुँदैन, तपाइहरु ढुक्क भए हुन्छ’ उनले भने ‘अहिलेसम्म मैले जहाँजहाँ बसेर जिम्मेवारी लिएँ कतै पनि भ्रष्टाचार गरिन र अब पनि गर्दिन, भ्रष्टाचार गर्नु भनेको आमाको रगत खानुसरह हो ।’ उनले संसदमा पनि पटक पटक यस्ता कुरा उठाउने गरेका छन् ।
लिङ्देनसँगै बाँकेको नेपालगञ्ज उप–महानगरपालिकाका प्रमुख धवल शमशेर राणालाई पनि महामन्त्रीको उम्मेदवार घोषणा गरिएको छ । यसअघि अध्यक्षमा उठ्छु भन्दै आएका राणा र लिङ्देनबीच सहमति भएपछि राणा पछि हटेर लिङ्देनको मोर्चामा आएका हुन् । यसअघि उनीहरुले आफूहरुमध्ये एक जना अध्यक्षमा साझा उम्मेदवार हुने र एकले अर्कालाई सहयोग गर्ने स्पष्ट पारेका थिए । राप्रपामा अध्यक्ष कमल थापाको कार्यशैलीप्रति धेरैको असन्तुष्टि छ । थापा आफ्नो विरुद्धमा कसैले बोले भने सिधै पार्टीबाट निश्कासन गर्न पनि पछि पर्दैनन् । थापाले अरु कसैलाई मान्छे नै नगन्ने र आफूले भनेको कुरामात्र लाद्न खोज्ने भएकाले उनी विस्तारै कमजोर बन्दै गएका छन् । अहिले पनि अध्यक्षको उम्मेदवारी दिने तयारीमा रहेका थापाविरुद्ध एउटा ठूलो मोर्चा नै बनेको छ । राप्रपाको महाधिवेशन मंसिर १५ देखि १७ सम्म काठमाडौंमा हुँदैछ । पार्टीमा पटक पटक विभिन्न विवाद आइरहँदा विभाजनको श्रृंखला लामो छ ।
लोहनी र राणाले अध्यक्षको दाबी गरेका छैनन् । थापाले पार्टीलाई ध्वस्त पारेको, राजनीतिक अडान नलिएको, सरकारमा जान जोसँग जस्तो पनि सम्झौता गरेको र व्यक्तिगत स्वार्थका लागि पार्टीलाई बन्धक बनाएको आरोप सहिरहेका छन् । लिङ्देनले अध्यक्षमा अघि बढेपछि थापा पनि अत्तालिएका छन् । लिङ्देनले आफूसँग पार्टी हाँक्ने स्पष्ट दृष्टिकोण भएको बताउँदै आएका छन् । आफ्नो तुलनामा एक सामान्य कार्यकर्तासँग पनि पराजित हुनुप¥यो भने थापाको लागि योभन्दा लज्जाको विषय अरु नभएकाले पनि जसरी भए पनि अध्यक्ष जित्नुपर्ने थापालाई चुनौती छ । थापालाई अहिलेसम्म पार्टी बिगारेको सबै दोष लागेको छ भनें लिङ्देनले पार्टीमा ठूलो भूमिका नपाएकाले उनी परीक्षणकै क्रममा छन् । लिङ्देनले पार्टीलाई सही ढंगले अघि बढाउलान् भन्नेमा कार्यकर्ता विश्वस्त बन्दै आएका छन् । थापालाई पुराना नेताको साथ छ भने लिङ्देनले युवा र नयाँ सोच भएकालाई आफ्नो पक्षमा पारेका छन् ।