काठमाडौं । नेकपा एमालेको १० औं महाधिवेशन मंसिर १० देखि १२ सम्म चितवनमा हुँदैछ । महाधिवेशनले नयाँ विचार दिने सम्भावना कम छ तर पनि नयाँ नेतृत्व भनें चयन हुने छ ।
महाधिवेशनबाट फेरि पनि ओली नै अध्यक्ष बन्ने पक्कापक्की छ । ओलीले पार्टीलाई राम्रो गरे कि गरेनन् भन्ने समीक्षा हुन सकेको छैन र हुँदैन पनि । यसअघि भएको विधान महाविधेशनमा पनि ओलीले अनावश्यक तडकभडक गरेका थिए । जताततै आफ्नै फोटो टाँसेर मख्ख परेका ओलीले यो महाधिवेशनलाई पनि आफूकेन्द्रित बनाउँदैछन् । एमाले भनेको पार्टी हो भन्ने कुरा बिर्सिएर कार्यकर्ताले पनि एमाले भनेर ओलीलाई चिनिन्छ भन्ने गलत विश्लेषण गर्न थालेका छन् । महाधिवेशनले एमालेको आगामी रणनीति के हुने भन्ने प्रष्ट पार्न सकेको छैन । ओलीले प्रधानमन्त्री हुँदा पार्टीमाथि घात गरेर एमालेलाई कहाँसम्म पु¥याए भन्ने हिसाव खोज्ने कोही निस्केको छैन । ओलीको प्रधानमन्त्री पद गएसँगै आफ्नो नेतृत्वमा रहेको ४ वटा प्रदेशका मुख्यमन्त्री गुमाएको पीडाले ओलीलाई छोएकौ छैन ।
नेतृत्वले गरेको गलत कामलाई पनि आँखा चिम्लेर समर्थन जनाउनेले एमालेलाई पनि क्रमशः कमजोर बनाउँदै लगेका छन् । ओलीले संविधानविपरीत संसद भंग गरेको घटनाले गलत इतिहास रचेको छ । पार्टीलाई आन्तरिक विवादमा धकेलेर राजनीतिक फाइदा लिने सोच बनाएका ओलीलाई आगामी दिनमा एमाले चलाउन पनि निकै ठूलो चुनौती आइलाग्ने छ । ओलीले माधवकुमार नेपाललाई पार्टीबाट लखेटेर आनन्द मानेका छन् यो भोलिको दिनमा खतरा सावित हुने छ । अध्यक्षमा प्रतिष्पर्धा गर्ने नेपाललाई पार्टीबाट निकालेपछि ओली तत्काललाई सुरक्षितजस्तो देखिए पनि भोलिको राजनीतिमा भनें यो घटनाले निकै असर पार्ने निश्चित छ ।