काठमाडौं । नेकपा एमाले विभाजन गरेर नेकपा (एकीकृत समाजवादी) गठन गरेका माधवकुमार नेपालले प्रदेश नम्बर १ र बागमती प्रदेशमा मुख्यमन्त्री पाएपछि पार्टीको अस्तित्व जोगिँदैछ ।
नयाँ पार्टी गठनमा हौसिएका नेपाललाई अन्तिम समयमा आएर सोचजस्तो उपलब्धी हात परेको थिएन । प्रदेशका सांसदहरुले आफ्नो पार्टी रोजे पनि स्थानीय तहमा निकै कमजोर भएका नेपाल एक समय निराश भइसकेका थिए । सत्तारुढ गठबन्धन बनाउन र केपी शर्मा ओलीलाई प्रधानमन्त्रीबाट हटाउन मुख्य भूमिका खेलेका नेपालले पार्टीलाई संगठित गर्दै लगेका छन् । नेपालकै सक्रियताका कारण ओली प्रधानमन्त्रीबाट बाहिरिएका थिए जसको फाइदा कांग्रेसले उठाएको छ । प्रमुख प्रतिपक्षीको भूमिका रहेको कांग्रेस सभापति शेरबहादुर देउवालाई प्रधानमन्त्री बनाउन नेपाल नै सक्रिय रहेका थिए । गठबन्धनले आगामी निर्वाचनसम्म सहकार्य गर्ने जनाइसकेको छ । नेपालले पार्टीको अस्तित्वका लागि पनि दुइवटा प्रदेशमा आफ्ना नेता मुख्यमन्त्री बन्नुपर्ने अडान लिएपछि सत्ता गठबन्धनमा पनि मतभेद भएको थियो । केन्द्रमा गरिएको निर्णयलाई प्रदेशमा नमान्ने भनेर प्रदेश सांसदहरु रुष्ठ भए पनि अन्तिममा आएर केन्द्रको निर्णय मान्न बाध्य हुनुपरेको थियो ।
गठबन्धनले यी दुइवटा प्रदेशमा सरकारको नेतृत्व आलोपालो गर्ने सहमति गरेको छ । सहमति अनुसार सबैभन्दा पहिले नेपालको पार्टीले मुख्यमन्त्री लिएको छ । सरकारको आलोपालोले जनतामा निराशा छाएको भनेर आलोचना भए पनि नेताहरुले बाध्यताको उपज हो भनेका छन् ।