काठमाडौं । पूर्वराजा ज्ञानेन्द्रलाई प्रधानमन्त्री शेरबहादुर देउवाले निर्वाचनमा आउन धम्क्याएका छन् । देउवाको यो धम्कीलाई राजनीतिमा निकै महत्वका साथ हेरिएको छ ।
राजतन्त्रवादीहरु राजा नै आउनुपर्छ भनेर सडकमा संघर्ष गर्दै गरेको बेला देउवाले दिएको यो चुनौती कम अर्थपूर्ण छैन । ज्ञानेन्द्रले पार्टी नै दर्ता गरेर निर्वाचनमा भाग लिए भने उनको पक्षमा सोचेभन्दा बढी मत नआउला भन्न सकिँदैन । पछिल्लो समयमा गणतन्त्र कमजोर भएको र जनताको आशामाथि प्रहार भएकाले पनि राजावादीहरु बलियो बन्दै गएका छन् । कांग्रेस, एमाले र माओवादीको शासन व्यवहोरेर दिक्क भएका जनताले अब कुनै विकल्प खोजेका छन् त्यो राजसंस्था नहोला भन्न सकिँदैन । राजसंस्थाको पनि शासनकालमा कतिपय कमजोरी होलान् तर अहिले जनताले ती सबै बिर्सिएका छन् । दलहरुको फोस्रो आश्वासनका कारण हैरान भएका जनताले त्यही रिसमा राजावादीको पार्टीलाई मतदान गर्दैनन् भन्ने आधार छैन । ज्ञानेन्द्र भ्रमणको क्रममा जहाँ पुगेका छन् उनको पक्षमा राम्रो लहर चलेकाले पनि त्यो पक्ष आशावादी बनेको छ ।
नेकपा एमालेका नेता मदनकुरमार भण्डारीले पनि कुनै समय तत्कालीन राजा बिरेन्द्रलाई श्रीपेच खोलेर आफूसँग निर्वाचन लड्न आउ भनेका थिए । त्यतिबेला राजाको पक्षमा माहौल राम्रो भएका बेला नै भण्डारीले यस्तो चुनौती दिएका थिए । यो समयमा राजसंस्था कि गणतन्त्र ठिक भनेर जनताले छान्ने बेला भएको छ ।