काठमाडौं । भ्रष्टाचारविरुद्ध नेपालले अमेरिकी सहयोग परियोजना (एमसीसी) देशको हितमा नभएको ठहर गरेको छ । उसले यस प्रकारका आयोजनाले नेपाल र नेपालीमाथि प्रहार गर्ने जनाएको छ । एमसीसी बारेमा विभिन्न ढंगका बहस भइरहेको बेला यो संस्थाले पनि आफ्नो धारणा अघि सारेको हो । संस्थाले एक विज्ञप्ति प्रकाशित गरी एमसीसीबारे सरकारलाई सचेत गराउँदै सबै नागरिकलाई यसप्रति जिम्मेवार बन्न समेत आग्रह गरेको छ ।
गुपचुप रुपमा सरकारले एमसीसी सम्झौता गरेर नेपालको राष्ट्रियतामाथि प्रहार गर्न खोजेको भन्दै सचेत रहन उसले आग्रह गरेको हो । संस्थाका अध्यक्ष रामकुमार ठाकुरद्वारा प्रकाशित विज्ञप्तीमा संविधानविपरीत सम्झौता गर्दा देशले हार्ने स्पष्ट पारिएको छ । संस्थाले हिजोको दिनमा कोशी, गण्डकी, महाकालीजस्ता सम्झौता गरेर आएको परिणामबारे पनि बुझ्न सरकारलाई आग्रह गरेको छ । संस्थाले एमसीसीले दिने ५५ अर्व रुपिँया कुनै ठूलो व्यापारीसँग कर असुली गर्दैमा आउने समेत जनाएको छ । संस्थाले यसैबारे जानकारी दिन थापागाउँको सम्वाद क्लवमा पत्रकार सम्मेलन पनि
गरेको थियो । अध्यक्ष ठाकुरले सरकारले हचुवाका भरमा त्यसप्रकारका सम्झौता गर्दा देश र नागरिकमाथि अन्याय हुने भएकाले त्यसतर्फ गम्भीर बन्न पनि सरकारलाई आग्रह गरेका छन् । ‘यस प्रकारका देशघाती सम्झौता गर्नुहुन्न, सानोतिनो पैसाको लोभमा राष्ट्रियता बेच्न पाइदैन’ अध्यक्ष ठाकुरले भने ‘ एमसीसी पारित गरे फाइदा हुन्छ भन्ने हो भने त्यो कुरा सरकारले पहिले जनतामाझ स्पष्ट पानुपर्छ ।’ संस्थाले भ्रष्टाचार र अनियमितताबारे आवाज उठाउँदै आएको छ ।