काठमाडौं । हिमाली भेगमा प्रचलित बहुपति प्रथाको कथामा बनेको चलचित्र ‘टुल्की’को फस्र्ट लुक पोष्टर र टिजर सार्वजनिक गरिएको छ । राजधानीमा आयोजित एक कार्यक्रममा चलचित्रको निर्माण पक्षले पत्रकार सम्मेलन गरी चलचित्रबारे जानकारी गराएको हो ।
द पाल्म गु्रप प्रालिको ब्यानरमा निर्माण गरिएको चलचित्रमा लक्ष्मण सुनारको कथा, देवजंग थापाको छायाँकन तथा निर्देशन रहेको छ । आरपी कर्माचार्य र शेखर लामाले चलचित्र निर्माण गरेका हुन् । शिशिर वाङदेल, स्वस्तिमा कार्की, नरेन्द्र तामाङ, सोम लामा, शेखर लामा, सौजन सुब्बा, सोफिया लिम्बु, दीर्घ लामा, भक्तसिंह कठायत लगायतको चलचित्रमा अभिनय छ ।
डोल्पाको तल्लो भागमा रहेको ब्राम्हण वस्तीमा जन्मेकी युवती माथिल्लो डोल्पाको शेर्पासँग माया प्रेममा परेर विवाह गरेपछि उनले त्यहाँको संस्कार नबुझेर भोग्नुपरेको कथालाई चलचित्रमा उतारिएको निर्माण पक्षले जनाएको छ । करिव ४ वर्षको अध्ययनपछि चलचित्रको निर्माण गरिएको निर्माता शेखर लामाले बताए । उनका अनुसार अहिलेसम्म चलचित्रमा ९० लाख रुपैयाँ बढी लगानी भइसकेको छ ।
यो चलचित्र नेपालमा भन्दा पहिले विभिन्न देशमा प्रदर्शन गरिने निर्माण पक्षले जनाएको छ । निर्माण पक्षले लामो समयको अध्ययन र अनुसन्धानपश्चात मात्र चलचित्र बनाएकोले सबै दर्शकको मन जित्न सक्ने विश्वास लिएको छ । चलचित्रमा सन्जिव लिम्बुको संगीत, तारा थापा ‘किम्भे’को सम्पादन छ ।