काठमाण्डौ । कागेश्वरी मनोहरा नगरपालिकाका मेयर कृष्णहरी थापाले गान्धी आदर्श माध्यामिक विद्यालयमा अनावश्यक राजनैतिक हस्तक्षेप गर्न खोजेको भन्दै नेपाली कांग्रेस विरोधमा उत्रिएको छ । नेपाली कांग्रेस कागेश्वरी मनोहरा नगरपालिका वडा नं ९ इकाईले गान्धी स्कुलमा भएका पछिल्ला घटनाक्रमलाई लिएर विरोधका कार्यक्रम सार्वजनिक गरेको छ । यसै क्रममा शुक्रवार विहान इकाईको आयोजनामा गान्धी स्कुलको प्राङगणमा विरोध कार्यक्रमको आयोजना गरियो ।
सो इकाईका सभापति अनिल थापाका अनुसार मेयर थापाले शिक्षा ऐनलाई गैर कानुनी रुपमा संसोधन गर्दै विद्यालय ब्यवस्थापन समिति विघटन गर्ने र प्रधानाध्यापकलाई समेत हटाउने खेलो गरेको आरोप लगाए । गान्धी आदर्श माध्यामिक विद्यालयको ब्यवस्थापन समिति दुई बर्ष अगाडी तिनै थापाको समर्थनमा गठन गरिएको थियो । सो विद्यालयको ब्यवस्थापन समितिका अध्यक्ष राधेश्याम खड्का हुन् । उनको कार्यकाल अझै एक बर्ष बाँकी छ । विद्यालयमा पत्र प्राप्त नभएपनि नगरपालिकाले विज्ञप्ती मार्फत ब्यवस्थापन समिति विघटन गरिएको जनाएको छ । विद्यालयका प्रधानाध्यापक गणेश चन्दलाई समेत हटाएको भन्ने अपुष्ट जानकारी बाहिर आएको छ । नेकपा एमालेको पनि एक निश्चित गुटका कार्यकर्तालाई जागिर दिनका लागी प्रधानाध्यापक चन्दलाई हटाउन मेयरले चलखेल गरेको आरोप थापाको छ । उनले भने‘ विद्यालयमा राजनैतिक हस्तक्षेप गर्न खोज्ने कुनै पनि क्रियाकलापलाई हामी छाडदैनौ, हामी जस्तो सुकै आन्दोलन गर्न पनि तयार छौ । त्यसैले आन्दोलनबाट उत्पन्न हुने परिस्थितिको जिम्मेवारी मेयर थापाले लिनुपर्छ । ’
इकाई सभापति थापाले भने‘ मेयरले संचार माध्यमहरुको समेत दुरुपयोग गरी विद्यालयका बारेमा भ्रामक र कपोल्कपित सुचना दिनु भएको छ । जनतालाई मात्र होइन संचार माध्यमलाई समेत गुमराहमा राख्ने दुस्साहस मेयरले गर्नुभयो । उहाँलाई झुटको खेती गर्न निकै आउने रहेछ । ’ उनले भने ‘ मेयरले विद्यालयका बारेमा गरेका भ्रामक सुचनाका विषयमा संचार माध्यमहरुले समेत सत्य तथ्य पुष्टि गर्नु पर्ने अवस्था आएको छ । त्यसैले त्यो विषयमा अनुसन्धान गरिदिनु होला । ’

सो इकाईले एक सातासम्म विद्यालय क्षेत्रमा विरोधका कार्यक्रम संचालन गर्ने घोषणा पनि गरेको छ । विरोध कार्यक्रमबाट पनि समस्या सम्बोधन नभए कडा आन्दोलन गर्ने पनि सभापति थापाले जानकारी दिए । मेयरले विद्यालयका बारेमा गरेका सवै निर्णय तत्काल फिर्ता लिनु पर्ने माग उनीहरुको छ । यता मेयर थापाले भने कुनै पनि हातलमा विद्यालय ब्यवस्थापन समितिका अध्यक्ष राधेश्याम खड्का र प्रधानाध्यापक चन्दलाई हटाएरै छाड्ने बताएका छन् । मेयर थापा विरुद्ध शुरुवात देखी नै नेपाली कांग्रेसले आन्दोलन गर्दै आएको थियो । तर मेयर थापाले कांग्रेसले उठाएका कुनै पनि एजेन्डालाई लिएर सकारात्मक बनेका छैनन् ।