काठमाडौं । कोरोना लागेर केही दिन थला परेका वाफल काठमाडौका समाजसेवी ताराबहादुर कुँवर थाकेका छैनन् । उनले शनिवार रक्तदान अभियान चलाए । उनले आफूलाई जस्तो अरुलाई समस्या नपरोस् भनेर विभिन्न समयमा सामाजिक अभियान चलाएको बताउँछन् । उनी आफ्नो सेवाबाट जनताले राहत पाउँछन् भने कहिल्यै पनि पछि नहट्ने बताउँछन् ।
५० पाउण्ड रगत संकलन गर्ने लक्ष्य लिएका उनको अभियानमा झण्डै ७० जना रक्तदानको लागि तयार भए पनि २६ पाउण्ड रगतमात्र संकलन भएको थियो । ‘रक्तदान गर्न त धेरै मानिस आएका थिए तर कसैको के मिलेन, कसैले दिन मिलेन सोचेभन्दा कम भयो’ उनले भने ‘हाम्रो अभियानमा देखिएको उत्साहचाहिँ गजव लाग्छ, सामाजिक अभियान भएकाले कसैले पनि सहयोग गर्दिन भन्दैनन् ।’ कुँवर प्रमुख रहेको हजुरलाई नमस्ते परोपकारी अभियानको नेतृत्वमा लाइन्स क्लव अफ काठमाडौं धौलागिरी, रोटरी क्लव अफ त्रिपुरेश्वर, लाइन्स क्लव अफ काठमाडौ सोसियल फ्रेन्डले पनि सहकार्य गरेका थिए ।
उनी लकडाउनमा पनि निरन्तर समाजसेवामा लागिरहे । झण्डै २५ सय जनालाई उनले राहतस्वरुप चामल, दाल, साबुन, चिनी, तेल, नुनलगायतका सामग्रीका साथै स्वास्थ्य सामग्री पनि बाँडे । ‘म कोरोना संक्रमित भएँ, केही समय घरमै बसे, अलिकति ठिक भएपछि मन मानेन र फेरि सक्रिय भएँ’ उनले भने ‘समाजसेवाबाट नै मनमा शान्ति मिल्ने भएकाले निरन्तर लागिरहेको छु ।’ उनले गत वर्षदेखि भएको लकडाउनबाट नै रक्तदान गर्दै र गराउँदै आएका छन् । उनले कोरोना संक्रमितलाई अक्सिजनको अभाव हुँदा विभिन्न ठाउँमा लुकाएर राखिएका अक्सिजन सिलिण्डर पनि खोजेर बिरामीलाई र अस्पताललाई दिएका थिए ।