काठमाडौं । एकीकृत तामाङ राष्ट्रिय मुक्ति मोर्चा नेपालले राष्ट्रपति विद्यादेवी भण्डारी पनि प्रतिगमनको मतियार बनेको आरोप लगाएका छन् ।
दोश्रोपटक संघीय संसदको प्रतिनिधिसभा विघटन गरेपछि विज्ञप्ति निकाल्दै मोर्चाका संयोजक सुर्यमान दोङ लालध्वजले प्रधानमन्त्री केपी ओलीको असंवैधानिक कदमलाई साथ दिएर राष्ट्रपति भण्डारी पनि प्रतिगमनको मतियार भएको बताएका हुन् ।
त्यस्तै दक्षिणपन्थी शक्तिको आड र इच्छामा ओलीले संसद विघटन गरेको भन्दै यसका विरुद्ध मोर्चा जस्तोसुकै आन्दोलनमा जाने विज्ञप्तिमा उल्लेख छ ।
‘धारा ७६ को उपधारा ५ अनुसार बहुमत सिद्ध गर्न सक्ने प्रतिनिधिसभाका सदस्यलाई प्रधानमन्त्रीमा नियुक्ति गर्नुपर्ने राष्ट्रपतिको संवैधानिक दायित्व हो । तर, यसअघि पनि संसदको असंवैधानिक विघटन गरी प्रतिगमनको बाटो समाततिसकेका प्रधानमन्त्री ओलीसँगको साँठगाँठमा नियोजित ढंगले संसद् विघटन गर्नुले राष्ट्रपति भण्डारी पनि प्रतिगमनको मतियार बनेको छर्लङ्ग भएको छ ।’ विज्ञप्तिमा भनिएको छ ।
प्रधानमन्त्रीले चालेको प्रतिगामी कदमको विरुद्धमा भइरहेको सबैखाले आन्दोलनमा आफूहरुको ऐक्येबद्धता रहेको भन्दै मोर्चाले देशभक्त अग्रगमनका पक्षधरताहरुलाई पनि डटेर आन्दोलन र प्रतिवादनमा उत्रिन अपिल गरेको छ ।