काठमाडौं । गोरखाको क्षेत्र नम्बर २ को (२) नम्बरबाट निर्वाचित नेपाली कांग्रेसका सांसद प्रकाशचन्द्र दवाडीले गोरखाको सिरान्चोक गाउँपालिका ७ मा माओवादीबाट निर्वाचित वडा सदस्यलाई कांग्रेसमा भित्र्याएका छन् ।
राजनीतिसँगै समाजसेवामा लाग्दै आएका सांसद दवाडीले अरु पार्टीका विभिन्न पदमा रहेर सक्रिय राजनीति गर्दै आएकालाई कांग्रेसमा प्रवेश गराएका छन् । सांसद दवाडीले कांग्रेसको विचार र सिद्धान्तलाई मन पराउँदै कांग्रेस भित्रिनेको लहर नै चलेको बताएका छन् । दवाडीले आफ्नो पार्टीले बाटो बिराएको र जनताको पक्षमा काम नगरेकाले कांग्रेस
बन्नुपरेको भनेर उनीहरु पार्टी प्रवेश गरेको बताएका छन् ।
सांसद दवाडीले गुरुङले माओवादी पार्टीप्रति असन्तुष्टि जनाउँदै कांग्रेस प्रवेश गरेको बताए । मंगलबार आयोजित एक कार्यक्रममा सांसद दवाडीले उनलाई फूलमाला र अविर लगाएर पार्टीमा स्वागत गरेका हुन् । सांसद दवाडीले केही दिनमै निर्वाचित वडाध्यक्ष पनि पार्टी प्रवेश गर्ने तयारी गर्दै गरेको बताए ।
सांसद दवाडीले सोमबार अजिरकोट गाउँपालिका १ मा स्थानीयसँग समसामयिक राजनीतिका साथै स्थानीय क्षेत्रको विकास निर्माणका बारेमा छलफल र अन्तरक्रिया गरेका थिए । उनले केही दिनअघि अजिरकोट गाउँपालिका २ का १०५ वर्षका कामी गुरुङलाई आफूले लगाएको ज्याकेट फुकालेर लगाइदिएका थिए । राजनीतिलाई अरुले कमाउने बाटो बनाएको भनेर असन्तुष्टि राख्दै आएका उनले समाजलाई दिनका लागिमात्र आफू राजनीतिमा लागेको स्पष्ट पार्दै आएका छन् ।
उनले चालु आर्थिक वर्षमा आफ्नो तलब भत्ताबाट ९ लाख रुपैयाँ सामाजिक काममा लगाएका छन् । उनले पाउने सांसदको तलव सधैं सामाजिक काममा लगाउने गरेका छन् । उनले पदमा रहँदा भ्रष्टाचार गर्ने र अकुत सम्पत्ति आर्जन गर्न खोज्ने नेताहरुलाई आफू उदाहरणीय बनेर राम्रो पाठसमेत सिकाएका छन् । प्रदेशसभा सदस्यको सपथ लिएकै दिन उनले सेवा सुविधावापत पाउने रकम आफ्नो परिवारका लागि उपयोग नगर्ने, सामाजिक काममा लगाउने घोषणा गरेका थिए । संसद बैठक भएका बेलामात्र प्रदेशको राजधानी पोखरा जाने गरेका उनी अधिकांश समय जनताको बीचमा नै हुन्छन् । उनले आफूले निर्वाचन क्षेत्रका नागरिकको स्वास्थ्य उपचार, विकास निर्माण, शिक्षा र कृषिजस्ता विषयमा सहयोग केन्द्रित गरेको बताए ।
‘मेरो राजनीति समाजकै टेवाका लागि, मेरो राजनीति तपाइहरुकै सेवाका लागि’ भन्ने नारा बनाएर काम गर्दै आएका छन् । दवाडी गण्डकी प्रदेशसभामा नेपाली कांग्रेस संसदीय दलको प्रवक्ता छन् ।