काठमाडौं । अविरल वर्षाका कारण राजधानी काठमाडौंका विभिन्न क्षेत्र जलमग्न भएका छन् भने नदीको तटीय क्षेत्रमा बाढी पसेको छ ।

धोबी खोलाको पानीको बहाव खोलाको किनारा सडकसम्म आइपुगेको छ । कपन मिलनचोक खहरे खोला बढ्दा खहरे खोला वरिपरिका पसलहरूमा पानी पसेको छ ।

चाबहिल गोपीकृष्णदेखि कालोपुल, रातोपुल जाने धोबीखोला करिडोर सडकसम्म खोला आइपुगेको छ । सामाखुसीको रेडन कलेज आसपासको क्षेत्रमा डुबान भएको छ । अनामनगरका विभिन्न क्षेत्र जलमग्न हुँदा आवतजावत प्रभावित भएको छ । रातभरको झरीले काठमाडौंका कपन क्षेत्र पनि प्रभावित भएको छ । गोकर्णेश्वरको सानो पुल बाढीले डुबाएको छ भने आवतजावतमा समस्या भएको छ ।