काठमाडौं । आगामी वैशाख १० गते हुने उपनिर्वाचनका लागि बिहीबार उम्मेदवारको अन्तिम नामावली प्रकाशन गरी चुनाव चिह्न वितरण गरिँदै छ।

उम्मेदवारी फिर्ता लिनका लागि निर्वाचन आयोगले बिहान ९ बजेदेखि दिउँसो १ बजेसम्म समय तोकेको छ। त्यसपछि उम्मेदवारको अन्तिम नामावली प्रकाशन गरिनेछ। उम्मेदवारको अन्तिम नामावली प्रकाशन भएपछि बिहीबार नै आयोगले चुनाव चिह्न दिने छ।

तनहुँ–१, बारा–२ र चितवन–२ मा आगामी वैशाख १० गते प्रतिनिधिसभा सदस्यका लागि हुने उपनिर्वाचनका लागि वैशाख १० गते बिहान ७ बजेदेखि साँझ ५ बजेसम्म मतदान हुने निर्वाचन तालिका छ।

उपनिर्वाचनका लागि सोमबार उम्मेदवारको मनोनयन पत्र दर्ता भएको थियो। तीन क्षेत्रमा ६९ जनाले उम्मेदवारी दर्ता गराएका छन् । मनोनयन दर्ता गराउनेमध्ये ३३ जना राजनीतिक दलका र ३६ जना स्वतन्त्र उम्मेदवार छन्।

तनहुँ–१ बाट निर्वाचित रामचन्द्र पौडेल राष्ट्रपति र बारा–२ बाट निर्वाचित रामसहायप्रसाद यादव उपराष्ट्रपति निर्वाचित भएपछि ती स्थानमा उपनिर्वाचन हुन लागेको हो। यस्तै राष्ट्रिय स्वतन्त्र पार्टीका अध्यक्ष रवि लामिछाने नागरिकता विवादमा दोषी ठहर भई पदमुक्त भएकाले चितवन–२ मा उपनिर्वाचन गर्न लागिएको हो।