काठमाडौं । रामेछाप जिल्ला अस्पतालका निमित्त मेडिकल सुपरिटेन्डेन्ट डा. केशव श्रेष्ठ सोमबार बिहानदेखि सम्पर्कविहीन भएका छन् ।

सामाजिक सञ्जाल फेसबुकमार्फत् अलबिदा शीर्गकमा उनले लामो स्टाटस लेखेका छन् । उक्त स्टाटसमा डा।श्रेष्ठले राजनीतिक हस्तक्षेप, मानसिक दबाब, बदला र व्यवस्था विरोधी तत्वहरूका कारण आफू विक्षिप्त अवस्थामा पुगेको उल्लेख गरेका छन् ।

रामेछाप अस्पताललाई व्यवस्थित, पारदर्शी र उत्कृष्ट सेवा केन्द्र बनाउने लक्ष्यमा लाग्दा विभिन्न स्वार्थ समूह र प्रभावशाली व्यक्तिहरूले झूठा आरोप र धम्की दिएको उनले बताएका छन् । अनावश्यक सरुवा प्रक्रिया थोपरेको पनि उनको आरोप छ ।

आफूलाई यो अवस्थामा पुर्‍याउने व्यक्तिहरूको नामसमेत उनले किटान गरेका छन् । उनले लामो समयदेखि भोग्दै आएको अन्याय, प्रशासनिक हस्तक्षेप, र मानसिक यातनाले थकित हुँदै अन्ततः आत्मसमर्पणको मनस्थितिमा पुगेको स्पष्ट संकेत दिएका छन्।