काठमाडौँ । ‘मिस नेपाल २०२४’का लागि आवेदन खुला भएको छ । बुधबार होटल हिमालयनमा एक कार्यक्रमका बिच नयाँ संस्करण घोषणा गरिएको हो ।

आवेदन दिने अन्तिम मिति नयाँ वर्षको जेठ १ गतेसम्म रहेको आयोजक द हिडन ट्रेजरले जानकारी दियो । आयोजकका अनुसार ललितपुरको गोदावरीस्थित सनराइज कन्भेन्सन सेन्टरमा साउन १९ गते फाइनल आयोजना हुनेछ ।

५ फिट ३ इन्च उचाइ भएका तथा १८ देखि २७ वर्ष उमेर समूहका अविवाहित नेपाली नागरिक युवतीले सहभागीका लागि आवेदन दिन सक्नेछन् ।

यस वर्ष पनि प्रतियोगितामा ‘मिस नेपाल वर्ल्ड’, ‘मिस नेपाल अर्थ’ र ‘मिस नेपाल इन्टरनेसनल’तीन विजेता छानिनेछ । पोखरा, बिर्तामोड, इटहरी, वीरगञ्ज, चितवन, भैरहवा, नेपालगञ्ज, सुर्खेत र काठमाडौंमा छनौट चरणको अडिसन हुनेछ ।

कार्यक्रममा यसैवर्षदेखि हिडन ट्रेजरले पुरुष सौन्दर्य प्रतियोगिता पनि आयोजनाको जानकारी दियो । संस्थाका प्रबन्ध निर्देशक प्रमोद कंसाकारले चाँडै यसबारे विस्तृत जानकारी दिइने जनाए ।