काठमाडौँ । ‘सूर्यदर्शन सहकारी ठगी मुछिएका उपप्रधान तथा गृहमन्त्री रवि लामिछानेले सहकारी ठगीमा आफ्नो नाम मात्रै भएको बताएका छन् ।

संसदीय समिति अन्तर्गत बुधबार राज्य व्यवस्था समितिको बैठकमा सम्बोधन गर्ने क्रममा उनले यस्तो कुरा बताएका हुन् । नेपाली कांग्रेसका सांसद दिलेन्द्र बडुले सहकारी प्रकरणमा मुछिएका गृहमन्त्रीले राजीनामा दिनुपर्ने समितिमा आवाज उठाएपछि सत्तारुढ राष्ट्रिय स्वतन्त्र पार्टीका सभापति समेत रहेका उपप्रधान तथा गृहमन्त्री लामिछानले सहकारी ठगीमा आफ्नो नाम मात्रै भएको तर्क गरेका हुन्।

लामिछानेले भने, ‘सहकारी ठगीमा मेरो नाम मात्रै छ,म माथि अनुसन्धान भएको छैन । उक्त प्रकरणसम्बन्धी बयानमा कसैले पनि मेरो नाम लिएको छैन र म विरुद्ध मुद्धा पनि परेको छैन।’

बैठकमा समिति सदस्य काँग्रेस सांसद बडुले सहकारी प्रकरणको निष्पक्ष छानबिनको अवधिभर गृहमन्त्री लामिछाने पदबाहिर बस्नुपर्ने जिकिर गरेका थिए।