काठमाडौं । बहुप्रतिक्षित लघु चलचित्र ‘किबोर्ड’ भोलि सार्वजनिक हुने भएको छ । बालसाहित्यकार विजयराज आचार्यद्वारा लिखित कथामा आधारित उक्त लघु चलचित्र आज शुक्रबार नेपाल प्रज्ञा प्रतिष्ठानमा सार्वजनिक गरिने भएको जानकारी क्रियटिभ सेन्टर नेपाल प्रा.लि.ले दिएको छ ।

क्रियटिभ सेन्टर नेपालको पहिलो प्रस्तुतिको रुपमा उक्त लघु चलचित्र आउने भएको हो । आचार्य गोपालले निर्देशन गरेको उक्त लघु चलचित्रको निर्माता सन्देश आचार्य तथा सह–निर्माता कौशल कुमार भट्टराई रहेका छन् ।
बालकथा ‘किबोर्ड’ को कथाबस्तुमा केही परिमार्जन गरी विद्यार्थीलाई लक्षित गरी उक्त चलचित्र बनाइएको निर्देशक आचार्य गोपालले जानकारी दिएका छनु । आधा घण्टाको सो चलचित्रमा पारिवारिक अवस्था तथा बाल मनोविज्ञानलाई प्रस्तुत गरिएको निर्देशक आचार्य गोपालले जानकारी दिएका छन् । सो चलचित्रमा बाल गायकका रुपमा ख्याति कमाएका सुप्रिम मल्लको स्वरमा गीत समेत रहेको छ । उक्त गीत पनि म्युजिक भिडियोको रुपमा चाँडै नै बजारमा आउने तयारी भएको संगीतकार टेकेन्द्र नेपालीले जानकारी दिएका छन् । होम नेउपानेद्वारा लिखित उक्त गीत युट्युबमा राख्ने तयारी भैरहेको प्रा.लि.का अध्यक्ष कौशल कुमार भट्टराईले जानकारी दिए ।

प्रतिनिधिसभाका सांसद तथा काठमाडौं महानगरपालिकाका उपप्रमुखको आतिथ्यतामा हुने उक्त कार्यक्रममा सहभागिताका लागि खासगरी विभिन्न विद्यालय÷कलेजका प्राचार्यहरुलाई आयोजकले आग्रह गरेका छन् ।
यसैबीच ‘किबोर्ड’ का लेखक तथा साहित्यकार विजयराज आचार्यको नयाँ कृति ‘स्वर्गमा मोबाइल’ को विमोचन पनि गरिने भएको छ । बाल साहित्यमा कलम चलाउँदै आएका आचार्यको हालसम्म एक २० वटा कृति प्रकाशित भैसकेका छन् । बालबालिकाको कथाबस्तुलाई आफ्नो कृतिको विषयबस्तु बनाउँदै आएका आचार्यले आफ्नो कृति ‘किबोर्ड’ पहिलो पटक चलचित्रको रुपमा आउने भएकोमा प्रसन्नता प्रकट गरेका छन् ।