काठमाडौं । माघ ११ गते बिहीबार हुने राष्ट्रियसभाको निर्वाचनमा नेकपा एमालेले कुनै पनि सिट नजिते दुई वर्षपछि नेकपा एमालेका सांसद सोनाम ग्याल्जेन शेर्पा राष्ट्रियसभामा एक्लो सांसद् हुने भएका छन् । उनी २०७८ को माघमा भएको निर्वाचनमा कोशी प्रदेशबाट राष्ट्रियसभामा निर्वाचित भएका हुन् । अहिले एमालेका तर्फबाट राष्ट्रियसभामा १६ सांसद छन्, जसमध्ये ८ जनाको कार्यकाल फागुन २० गते सकिँदैछ ।

अबको निर्वाचनमा एमालेका कुनै पनि उम्मेदवार निर्वाचित नभए फागुन २१ पछि राष्ट्रियसभामा ८ जना सांसद रहन्छन् । उनीहरुमध्ये ७ जनाको कार्यकाल २०८२ को फागुन २० गतेसम्म मात्रै रहन्छ । सोनाम भनें २०७८ मा निर्वाचित भएर आएका हुनाले उनको कार्यकाल २०८४ को फागुन २० गतेसम्म रहन्छ ।

राष्ट्रियसभाको निर्वाचन हरेक दुई–दुई वर्षमा हुँदै आएको छ । राष्ट्रियसभा गठनसम्बन्धी संवैधानिक व्यवस्था अनुसार हरेक दुई वर्षमा एक तिहाई सदस्य रिक्त हुने र जुन पद्धतिबाट रिक्त भयो त्यही प्रक्रियाबाट अर्को व्यक्ति निर्वाचित हुने छ ।
पद रिक्त हुनुभन्दा ३५ दिनअघि राष्ट्रियसभाका सांसद चयन भइसक्नुपर्ने संवैधानिक व्यवस्था छ । ७ प्रदेशबाट निर्वाचनको प्रक्रियाबाट आएका प्रत्येक प्रदेशबाट ८ जनाका दरले निर्वाचित ५६ जना र सरकारको सिफारिसमा राष्ट्रपतिबाट मनोनीत हुने ३ जना गरी राष्ट्रियसभामा ५९ सांसद रहने छन् । संघीय संसद अन्तर्गतको राष्ट्रियसभालाई माथ्लो र प्रतिनिधिसभालाई तल्लो सदनका रुपमा चिनिन्छ । यी दुबै संसदलाई संयुक्त रुपमा संघीय संसद भनिन्छ ।