काठमाडौं । राजनीतिक रुपमा झापा निकै चर्चित जिल्ला रहेको छ । यहाँबाट राजनीति गरेकाहरु निकै ठूलो पदमा पुग्ने गरेका छन् । पूर्वप्रधानमन्त्री केपी शर्मा ओलीको निर्वाचन क्षेत्र पनि झापा नै हो । उनी झापा–५ बाट प्रतिनिधिसभामा निर्वाचित भएका हुन् । माघ ११ गते हुने राष्ट्रिय सभाबाट निर्वाचित भएर आएपछि झापाकै कृष्णप्रसाद सिटौला राष्ट्रिय सभाको अध्यक्ष हुने दलहरुबीच सहमति भइसकेको छ । प्रतिनिधिसभाका सभामुख देवराज घिमिरे झापा–२ बाट निर्वाचित सांसद हुन् । प्रतिनिधिसभाकै उपसभामुख इन्दिरा राना पनि झापाकै हुन् ।
राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङदेन झापा–३ बाट निर्वाचित सांसद हुन् । झापामा नै कोशी प्रदेशका २ जना मुख्यमन्त्री रहेका छन्  । कोशी प्रदेशका सभामुख अमर बहादुर विष्ट, नेकपा एमालेका कोशी प्रदेशका संसदीय दलका नेता हिक्मत कार्की र नेपाली काँग्रेसका प्रदेशकै संसदीय दलका नेता उद्धव थापा मुख्यमन्त्री भइसकेका छन् । कार्की झापा–५ बाट प्रदेश सभामा २ पटक निर्वाचित भएका छन् । राप्रपाका प्रदेशका संसदीय दलका नेता भक्ति सिटौला पनि झापाकै हुन् । उनी झापा–४ बाट प्रदेशमा निर्वाचित भएका हुन् । नेकपा मालेका महासचिव सीपी मैनाली, पूर्वमन्त्री राधाकृष्ण मैनाली पनि झापाकै हुन् । उनीहरु दाजुभाई हुन् । नेपाली काँग्रेसका महामन्त्री विश्वप्रकाश शर्मा झापा–१ बाट निर्वाचित प्रतिनिधिसभा सांसद हुन् ।

यीमध्ये कतिपय प्रतिस्पर्धाबाट आएका छन् भने कतिपयले राज्यका प्रमुख पदमा नियुक्ति लिएका छन् भने कोही मनोनीत भएका छन् । लोकसेवा आयोगका अध्यक्ष माधव रेग्मी र सर्वोच्च अदालतका न्यायाधीश कुमार रेग्मी पनि झापाकै हुन् । पूर्व मुख्यमन्त्री कार्की, सर्वोच्च अदालतका न्यायाधीश रेग्मी, लोकसेवा आयोगका अध्यक्ष रेग्म र कोशी प्रदेशका सभामुख विष्ट झापाको गौरादह निवासी हुन् । पछिल्लो समयमा झापालीले प्रमुख पदहरु पाउन थालेपछि अहिले सबै पद झापालीलाई नै भन्नेजस्तो भएको छ ।