काठमाडौं / अभिनेता दयाहाङ राई अभिनित नेपाली कथानक चलचित्र ‘हात्तीछाप’ आगामी माघ २६ बाट जापान र कोरियामा प्रदर्शन हुने भएको छ ।
नेपाली चलचित्रका लागि विदेशी बजार लगानी उठाउने बलियो माध्यम बन्दै गएको बेला दर्शकले प्रतीक्षा गरेका चलचित्रहरूले विदेशी बजारबाट राम्रो रकम भित्र्याउन सफल भएका छन् ।
यस्तैमा माघको २६ गतेबाट प्रदर्शनमा आउन लागेको चलचित्र ‘हात्तीछाप’ दर्शकको प्रतीक्षित सूचिमा छ । ‘दिमाग खराब’ रिलिज भएपछि सुनसान बनेको नेपाली चलचित्रको बजार अब यो चलचित्रले उकास्ने अपेक्षा रहेको छ ।
यसैबिच यो चलचित्र फेब्रुअरी ९ तारिख अर्थात् माघ २६ गतेबाट जापान र दक्षिण कोरियामा रिलिज हुने भएको छ । चलचित्रको रिलिज सहित जापान र कोरिया वितरणको जिम्मा टिम यूएनएले लिएको हो । यूएनए इन्टरटेन्मेन्टले चलचित्रको प्रचार जापान र कोरियामा धमाधम गरिरहेको छ । ‘चलचित्रको टिजर सार्वजनिक भएपछि जापान र कोरियाका दर्शकले हात्तीछापलाई प्रतीक्षा गरिरहनुभएको छ । यसले हामीलाई अझै उत्साहित बनाएको छ’ टिम यूएनएका प्रबन्ध निर्देशक उज्वल गुरागाँइले भने । किरण नेपालीको प्रस्तुतिमा सिमोस सुनुवारको निर्देशन रहेको चलचित्रमा दयाहाङ राई, सौगात मल्ल, उपासना सिंह ठकुरी, बेनिशा हमाल, विजय बराल, बुद्धि तामाङ, कमलमणि नेपाल, सुष्मा निरौला, विल्सन विक्रम राई लगायतका कलाकारको अभिनय रहेको छ ।