काठमाडौं । गणतन्त्र फालेर राजतन्त्र ल्याउन कम्मर कसेर लागेका मेडिकल व्यवसायी दुर्गा प्रसाई अन्ततः थच्चिन बाध्य भएका छन् । गत मंसिर ७ गतेदेखि आन्दोलनको आँधिबेहरी ल्याउने उद्घोष गरेका प्रसाईलाई राजावादीहरुले नै साथ नदिएपछि हिस्स परेका छन् । गणतन्त्रका पक्षमा काँग्रेस, एमाले र माओवादीका नेताहरु एकमत हुँदा राजतन्त्रको वकालत गर्ने राष्ट्रिय प्रजातन्त्र पार्टी, राप्रपा नेपाल र पूर्वराजा ज्ञानेन्द शाहवीच नै एकता हुन सकेन । प्रसाईको आन्दोलनप्रति पूर्वराजा शाह मौन बसे भने राष्ट्रिय प्रजातन्त्र पार्टी र राप्रपा नेपालले विश्वास गरेनन् । त्यतिमात्र हैन काठमाडौंको सिफलमा र बल्खुमा गरिएको कार्यक्रममा काठमाडौंबासीले नै साथ नदिएको जानकारहरुले बताएका छन् ।

तैपनि प्रसाईको आन्दोलन रोकिएको छैन । काँग्रेस सभापति शेरबहादुर देउवाले जनताले फालिसकेको राजतन्त्र नफर्कने बताएका छन् । त्यस्तै एमाले अध्यक्ष खड्ग प्रसाद ओलीले मरिसकेको राजतन्त्रको नली हाड लिएर राजावादीहरुले टाउको उठाउने प्रयत्न गरेको बताएका छन् । पछिल्लो समय दलका नेताको कार्यशैली, व्यवस्था, सरकार र पुराना दलहरुप्रति जनआक्रोश बढिरहेको छ । दलका नेताहरु नसच्चिए गणतन्त्रको लिंगो भाँचिन सक्ने जानकारहरुले बताएका छन् ।

काँग्रेसका महामन्त्री गगन थापाले पूर्वराजालाई राजतन्त्र फर्काउने च्याँसे नथाप्न सुझाव दिएका छन् । राजाले जुवाको खालमा गएर च्याँखे थाप्ने होइन, च्याँखे खालमा दाउ नराख्नुस्, खेल्ने भए सिधै खालमा भिड्न आए हुन्छ भन्दै आक्रोश पोखेका थिए । यस्तै आक्रोश अन्य दलका नेताहरुले पनि पोखेका छन् । व्यवसायी दुर्गा प्रसाईको आन्दोलनमा सहभागी भएका अधिकाँश व्यक्तिहरु कोभिड अगाडि बैंकबाट र लघुवित्तबाट ऋण लिएर ब्याज बुझाउन नसकेका व्यक्तिहरु रहेको बताइएको छ ।