काठमाडौं । प्रधानमन्त्री पुष्पकमल दाहालकी नातिनी प्रतिभा पाठक विवाह बन्धनमा बाँधिने भएकी छन् । भरतपुर महानगरपालिका प्रमुख रेनु दाहालकी छोरी प्रतिभाले गोरखाका विज्ञानबाबु रेग्मीसँग इन्गेजमेन्ट (टीकाटालो) गरेकी हुन् । उनीहरूबीच आगामी मंसिर २३ गते विवाह गर्ने तय भएको छ । प्रतिभाको इन्गेजमेन्टमा प्रधानमन्त्री प्रचण्ड पनि सहभागी भएका थिए । प्रतिभा उच्च शिक्षाका लागि विदेश गएकी थिइन् ।

त्यसैगरी पूर्व मिस नेपाल शृंखला खतिवडा र कान्तिपुर मिडिया गु्रपका प्रबन्ध निर्देशक सम्भव सिरोहियाले पनि यही मंसिर २८ गते लगनगाँठो कस्ने भएका छन् । केही वर्षदेखि प्रेम सम्बन्धमा रहेको यो जोडीले केही महिनाअघि मात्रै आफूहरुबीचको प्रेमसम्बन्ध सार्वजनिक गरेका थिए । करिब दुई महिना अगाडि शृंखलाले ‘होपलेस–रोमान्टिक’ जोडीका रूपमा सामाजिक सञ्जालमार्फत प्रेम सम्बन्धका तस्बिर सार्वजनिक गरेकी थिइन् ।

२०१८ मा मिस नेपालको उपाधि जितेकी शृंखला नेकपा एकीकृत समाजवादीका नेता विरोध खतिवडा र मुनु सिग्देलकी छोरी हुन् भने सम्भव व्यवसायी कैलाश सिरोहियाका छोरा हुन् । उनीहरुको विवाह हायात होटलमा हुने बताइएको छ । विवाहको रिसेप्सन पार्टी पनि पुस १ गते हायातमा नै राखिएको छ ।