काठमाडौं । नेपालीलाई नक्कली भुटानी शरणार्थी बनाएर अमेरिका पठाउने नेता, कर्मचारी तथा उनीहरुका सल्लाहकार र अरु धमाधम पक्राउ पर्न थालेपछि राजनीतिक वृत्तमा चर्चा चलेको छ । हिजो पदमा रहँदा गरेको गल्तीका कारण आज उनीहरुको रुवावासी भएको छ ।
नेपाल यस्तै हो, जे गरे पनि हुन्छ, कसैले पनि कारबाही गर्दैैन र केही परे पनि मिलाइहाल्छु भन्ने गलत सोचका कारण पछिल्लो समयमा यस प्रकारका गतिविधि बढ्दै गएका छन् । देश र जनतालाई घात हुने काम नेताहरुले पहिलेदेखि नै गर्दै आए पनि यो प्रकरणले भनें नेताहरुमाथि प्रश्न उठाएको छ । यो त एउटा उदाहरणमात्र हो योभन्दा अरु कति बदमासी गरेका होलान् भनेर मानिसले प्रश्न गरिरहेका छन् । पूर्व गृहमन्त्री तथा कांग्रेस नेता वालकृष्ण खाण पक्राउ परेपछि कांग्रेस पनि दवावमा परेको छ । खाणलाई पार्टीबाट निलम्बन गर्ने कि नगर्ने भन्ने विषय पनि अलमलमा परेको छ । खाणसँगै अरु धेरैको नाम जोडिएकाले अब के होला भन्ने आशंका बढेको छ । खाणले कानुनको पालना गर्दै प्रहरी घरमा पुगेपछि अनुसन्धानका लागि सहयोग गर्छु भनेर प्रहरीसँगै कार्यालय आउनु सकारात्मक कदम हो । खाणसँगै उनकी श्रीमती कांग्रेसकी केन्द्रीय सदस्य तथा प्रतिनिधिसभाकी सांसद मञ्जु खाणको पनि नाम जोडिएको छ । नाम जोडिएकाहरुले आफूलाई फसाउन खोजेको पनि भन्दै आएका छन् ।
पूर्वमन्त्री, नेकपा एमालेका सचिव तथा अर्धाखाँचीबाट निर्वाचित प्रतिनिधिसभाका सांसद टोपबहादुर रायमाझी अझै फरार छन् । उनको नाम पनि जोडिएको भनेर फेरि पनि समाचार आएको दिन उनी जिल्लामा एक कार्यक्रममा थिए । प्रतिनिधिसभाका सभामुख देवराज घिमिरेसँगै कार्यक्रममा रहेका उनी भैरहवाबाट सम्पर्कविहीन भएका हुन् । उनलाई प्रहरीले खोजी गरिरहेको छ । एमालेको एउटा नेतृत्व भनें रायमाझीलाई बचाउने र जोगाउने दाउमा छ । उनका छोरा भनें पक्राउ परिसकेका छन् । यो प्रकरणमा कांग्रेसका धेरै मानिसको नाम जोडिँदै गएको छ । नेपालीलाई भुटानी शरणार्थी बनाएर उनीहरुबाट धेरै चर्को रकम असुल गर्नेहरुको अहिले भागाभाग भएको छ । हिजो गरेको गल्तीलाई ढाकछोप गर्न अहिले उनीहरु सहारको खोजीमा छन् ।
सरकारले दोषी खोजी गर्न थालेपछि प्रहरीले यो प्रकरणमा संलग्न सबैलाई कारबाही गर्ने भन्दै अएको छ । एक व्यक्ति पक्राउ परेपछि उसले आफूसँग संलग्न भएका अरुको पनि नाम भनिदिएकाले दिनैपिच्छे मानिसहरु पक्राउ पर्दै आएका छन् । प्रहरीको निसानामा परेकाहरुले सामान्य विज्ञप्ती प्रकाशित गरी चोखिने प्रयास गरेका छन् । यो घटनामा कांग्रेसका सभापति तथा पूर्वप्रधानमन्त्रीसमेत रहेका शेरबहादुर देउवाकी श्रीमती आरजु देउवा पनि मुछिएकी छिन् । उनले आइतबारबाट सुरु भएको प्रतिनिधिसभाको बैठकमा आफ्नो नाम जोडिएकामा आपत्ति जनाइन् । उनले महिलाले केही राम्रो काम गरेको देख्न नसकेका कारण आफुमाथि आरोप लागेको बताएकी थिइन् । आरजुको नाम जोडेर कांग्रेसभित्र अरु यस्ता धेरै घटना आउने गरेका छन् । सर्वसाधरणले भनें यो घटनाको निश्पक्ष छानबिन हुनुपर्ने र दोषी जो भए पनि कारबाही गर्नुपर्ने बताउँदै आएका छन् ।