बर्लिन । जर्मनीको बर्लिन सहरस्थित र्‍याडिसन ब्लु होटेलमा राखिएको १० लाख लिटर पानी भरिएको विशाल एक्वारियम अचानक विस्फोट भएको छ । सो विस्फोटसँगै होटेल परिसर र नजिकका सडकमा बाढी सरी पानी बगेको छ ।

एक हजार ५०० माछा राखिएको ५२ फिट अग्लो ‘दी एक्वाडोम’लाई विश्वकै सबैभन्दा ठूलो सिलिन्डर आकारको एक्वारियम मानिन्थ्यो । उक्त विस्फोट हुँदा उछिट्टिएका काँचका टुक्राले काटिएर दुईजना व्यक्ति घाइते भएका छन् ।

प्रहरीले अकल्पनीय क्षति पुगेको प्रतिक्रिया दिएको छ । बिहान सबेरै सो दुर्घटना हुनासाथ होटेलमा रहेका पाहुनाहरूलाई बाहिर निकालिएको थियो ।

बलिर्नको अग्नि नियन्त्रण टोलीका एक प्रवक्ताले ठूलो संख्यामा माछा मरेको र अत्यन्तै चिसो मौसमका कारण उद्धारकार्यमा थप कठिनाइ भएको बताएका छन् ।

त्यस एक्वारियममा १०० भन्दा बढी फरक–फरक प्रजातिका माछा राखिएको थियो । अग्नि नियन्त्रण विभागका अधिकारी जेम्स क्लेइनले पोखिएर थुप्रै स्थानमा जम्मा भएको पानीमा भेटिएका जीवित माछालाई उद्धार गरी अर्कै एक्वारियमहरूमा हालिएको बताएका छन् । बीबीसीबाट ।