काठमाडौं । पार्टी सभापति शेरबहादुर देउवाको मनोमानि विरुद्ध कडा ढंगले प्रस्तुत हुन थालेको नेपाली काँग्रेसको शेखर कोइराला समूह यतिबेला आफ्नो शक्तिलाई एकीकृत गर्ने अभियानमा जुटेको छ । मुलुकव्यापी रुपमा कार्यकर्ताहरुलाई एकठिक्का बनाउन नसके पार्टीभित्र अपहेलित हुनुपर्ने निष्कर्ष सहित अगाडि बढेको सो समूहले सम्मानजनक भूमिकाका लागि दबाव बढाउन थालेको हो । यसैक्रममा सो समूहका भातृ संगठनहरुले समेत सक्रिय रुपमा संस्थापन पक्षमाथि खबरदारी गर्न थालेका छन् ।

सभापति देउवाले पार्टीमा न्यायोचित व्यवहार नगरेको भन्दै अब भागवण्डा खोज्नुपर्ने अवस्था आएको उनीहरुको निष्कर्ष छ । संस्थापनमाथि अहिलबाट नै दबाव बढाउन नसके कोइराला समूहका नेताहरुले निर्वाचन लड्नबाट वञ्चित हुनुपर्ने अवस्था आउन सक्ने निष्कर्ष समेत उनीहरुले निकालेका छन् । यसको अन्त्यका लागि पार्टीभित्र चल्दै आएको ६०–४० को भागवण्डा कार्यान्वयन हुनुपर्ने उनीहरुको माग छ । पार्टीको १४औं महाधिवेशनमा निकटतम प्रतिद्वन्दी कोइरालालाई मर्यादाक्रममा समेत निकै तल राखेका देउवाले भातृ संस्थाको अध्यक्ष मनोनयन गर्दा समेत आफ्नै पक्षलाई प्राथमिकतामा राखेका छन् । कुनै पनि भातृ संस्थाको नेतृत्व आफूले पाउन नसके पछि देउवाको निर्णय विरुद्ध आक्रोशित कोइराला समूहले आफू पक्षीय नेताहरुको भेला समेत आयोजना समेत गरिसकेको छ । न्यायोचित निर्णय नहुने भए भागवण्डामा जानुपर्ने उनले बताए । ‘न्यायोचित निर्णय गर्नुुहुन भने ४० प्लस चाहियो’ घिमिरेले भने, ‘सभापतिको अभिभावकीय ठाउँबाट सोचेर अगाडि बढाउनुभएको भए यो विवाद आउने थिएन नि । अब अस्तित्वको लडाइ लड्नुपर्ने भयो ।’