काठमाडौं । नयाँ शक्ति निर्माणको सपना तुहिएपछि डा. बाबुराम भट्टराई फेरि चोरबाटोबाट नेकपा माओवादी केन्द्रको शरणमा परेका छन् । संविधान जारी भएसँगै २०७२ असोज ९ मा तत्कालिन एकीकृत माओवादी परित्याग गरी नयाँ शक्ति नेपाल गठन गरेका उनी ७ वर्ष नपुग्दै सोही पार्टीमा फर्कने तयारीमा जुटेका हुन् । आशालाग्दो नारासहित गठन भएको नयाँ शक्ति भताभुङ्ग भएपछि मधेशवादी दल संघीय समाजवादी फोरमसँग पार्टी एकीकरण गरेर समाजवादी पार्टी गठन गरेका भट्टराई पछि समाजवादी पार्टी र राजपावीच एकता भएपछि बनेको जसपाका नेताका रुपमा रुपान्तरित भए । त्यसमा पनि अट्न नसके पनि नेपाल समाजवादी पार्टी गठन गर्न बाध्य भए । तर, सो पार्टीबाट आगामी निर्वाचनमा आफ्नो फलिफाप हुने नदेखेपछि उनी घुमिफिरी रुम्जाटारको अवस्थामा पुगेका हुन् । अहिलेलाई माओवादीको चुनाव चिन्ह हँसिया हथौडा प्रयोग गर्ने र निर्वाचन पछि पार्टी एकीकरण गर्ने उनको तयारी छ ।

भट्टराईको यही प्रस्ताव पछि माओवादी केन्द्रले आफ्नो निर्वाचन चिन्ह प्रयोग गर्न बाबुराम भट्टराईलाई दिने निर्णय समेत गरिसकेको छ । उनीसँगै नेकपा एकीकरण अभियान नामक पार्टी गठन गरेका पूर्व एमाले नेता बामदेव गौतमले पनि आगामी निर्वाचनमा माओवादीकै चुनाव चिन्ह हँसिया हथौडा प्रयोग गर्दैछन् । उता माओवादी केन्द्र भने नेपाली काँग्रेस लगायतका पाँच वटा दलसँग गठबन्धन गरेर आगामी निर्वाचनमा सहभागी हुँदैछ ।