काठमाडौं । आमूल परिवर्तन मसिह पार्टी नेपालको २०७८ फागुन २५ गते सम्पन्न प्रथम राष्ट्रिय महाधिवेशनले भरत गिरीको अध्यक्षतामा ७७ जनाको केन्द्रीय कार्यसमिति निर्विरोध चयन गरेको छ ।
पार्टीका केन्द्रीय अध्यक्ष भरत गिरीले प्रथम राष्ट्रिय महाधिवेशनले मार्ग निर्देशक सिद्धान्तमा आध्यात्मिक भौतिक समुन्नतवादलाई अगाडि बताएको बताए । फरक विचार र दृष्टिकोण राख्दै आएको यो पार्टीले वर्तमान अन्य राजनीतिक दलहरु गलत बाटोमा हिँडेकाले देश दिनैपिच्छे संकटतर्फ धकेलिएको बताए । महाधिवेशनले गरेका निर्णय सार्वजनिक गर्न राजधानीको रिपोर्टर्स क्लवमा आयोजित पत्रकार सम्मेलनमा उनले आगामी निर्वाचनमा आफूहरुको पार्टी निर्णायक हुने पनि दाबी गरे । उनले अरु पार्टीलाई जनताले परीक्षण गरिसकेकाले पनि यो पार्टीमा सबैको आकर्षण हुने उल्लेख गरे । उनले धार्मिक स्वतन्त्रतासहित राज्य धर्मनिरपेक्षता कायम गर्ने, बहुदलीय प्रतिस्पर्धासहितको गणतान्त्रिक दुई सदनको व्यवस्था गर्ने पार्टीको लाइन रहेको पनि स्पष्ट पारे । उनले संघीयता खारेजी आफूहरुको पहिलो लक्ष्य भएको बताए ।
उनले राज्यको तर्फबाट कुनै पनि जाति, भाषभाषी, भूगोललाई अवसर र दण्डका आधारमा पक्षपात गर्न नहुने तर्क गरे । उनले शिक्षा र स्वास्थ्यको जिम्मा सरकारको भए पनि सरकार आफ्नो कर्तव्यबाट भाग्न खोजेको आरोप लगाए । ‘स्वास्थ्य उपचार निःशुल्क गरी ६५ वर्षभन्दा माथिका नागरिकहरुलाई राज्यले नै सित्तैमा पालनपोषण गर्ने नीति लागु गर्नुपर्छ भन्ने हाम्रो अडान हो’ उनले भने ‘ हाम्रा एजेण्डा र माग राम्रा छन्, जसले गर्दा जनताको भलाई हुन्छ भन्ने सबैले बुझेका छन् त्यसैले पनि अबचाहिँ अरु पार्टीलाई मतदान गर्नुहुन्न होला भन्ने लाग्छ ।’ उनले आफ्नो पार्टीले झुट बोल्नेलाई दण्ड हुने नीति लागु गर्ने पनि बताए । उनले नेपालले कृषिमा आधुनिकीकरण गर्ने नीति जसरी पनि लागू गर्ने आफ्नो पार्टीको उद्देश्य रहेको स्पष्ट पारे ।
प्रमुख दल र नेताहरु नेपाली जनताको चाहना र ईच्छामा भन्दा पनि आफूमा बढी केन्द्रित भएकाले जनता सधैं निराश भएको बताए । उनले अहिले शासन गरेका नेतृत्वकर्ताहरुको कारणले नै व्यवस्था नै धरापमा परेको धारणा राखे ।