काठमाडौ । संसदबाट एमसिसी पास भएकोप्रति गम्भीर असहमति जनाउँदै गठबन्धनबाट राष्ट्रिय जनमोर्चाले अलग भएको छ । सोमबार बसेको केन्द्रीय सचिवालय बैठकले सत्ता गठबन्धनबाट राष्ट्रिय जनमोर्चाले अलग भएको घोषणा गरेको हो।

‘पाँच दलीय गठबन्धनभित्रको हाम्रो पार्टी बाहेकका चार पार्टीले एमसीसीलाई संसदद्वारा पारित गराउन गरेको षड्यन्त्र, जालझेल, तिकडम र साम्राज्यवादीहरुको दलाली तथा पृष्ठपोषण गर्ने काम गरेको हुनाले पाँच दलीय गठबन्धन देशको राष्ट्रियता, सार्वभौमसत्ता र अखण्डताको विरुद्ध खडा भएको स्थितिमा पाँच दलीय गठबन्धनलाई कायम राखिरहनु पर्ने औचित्य समाप्त भएको छ’, बैठकपछि जनमोर्चाले बताएको छ ।

राष्ट्रिय जनमोर्चाले अलग भएको घोषणासँगै पाँच दलीय सत्ता विभाजित भएको छ । ‘गठबन्धनबाट देशको सार्वभौमसत्ता र अखण्डतालाई गम्भीर क्षती पुगेकोले त्यसबाट हाम्रो पार्टी आएको मितिदेखि अलग भएको घोषणा समेत गर्दछौँ ।’

‘प्रतिगमनका विरुद्धको संघर्षको आवश्यकता महशुस गरेर नै पाँच दलीय गठबन्धन बनाइएको थियो । अहिले एमसीसीको प्रश्नमा गठबन्धनमा तीव्र मतभेद मतभेदका कारणले गठबन्धन टुट्न हुँदैन भन्ने हाम्रो मत रहँदै आएको छ’, जनमोर्चाकी उपाध्यक्ष तथा प्रवक्ता दुर्गा पौडेलले आइतबारको विज्ञप्तिमा बताएकी थिइन् ।

‘एमसीसीबारे मतभेद भएता पनि अन्य पक्षहरुको मतभेदहरूका बीचमा सम्झौता गर्ने वा कुनै मध्यमार्गी बाटो निकाल्ने प्रयत्नमा कुनै सम्झौता वा मध्यमार्गी बाटोको पक्षमा छैन । त्यसैले हुन सक्दछ, हाम्रो पार्टीलाई पाँच दलीय गठबन्धनबाट योजनाबद्ध प्रकारले नै अलग गर्ने प्रयत्न भइरहेको छ ।’ उनले बताएकी थिइन् ।