काठमाडौं । हलेसीे प्रतिष्ठानले प्रभाव राष्ट्रिय दैनिकका सम्पादक दिवंगत कमलराज राईको स्मृतिमा शनिबार शोकसभा आयोजना गरेको छ । चाबाहिलस्थित ए वान पार्टी प्यालेस एण्ड क्याफेमा आयोजित शोकसभामा विभिन्न क्षेत्रका व्यक्तिहरूले दिवंगत राईको योगदानबारे चर्चा गरेका थिए ।

सो कार्यक्रममा प्रभाव राष्ट्रिय दैनिकका पत्रकार दीपा सुनुवारले उनको जीवनीका बारेका बताएकी थिइन् । उनले दिवंगत राईले पत्रकारिता क्षेत्रमा पुर्‍याएको योगदान र सामाजिक जीवनका बारेमा चर्चा गरेकी थिइन् । शोकसभामा बोल्दै विकास राईले दिवंगत राई समाजिक कार्यमा निकै अग्रसर थिए । उनी गाँउमा एक प्रतिभाशाली व्यक्ति रहेको कार्यक्रममा बताएका थिए ।

यस्तै, कार्यक्रममा किशोर राईले सम्पादक राई एक आदर्श पात्र भएको बताएका थिए । उनले शोकमा भएका परिवारलाई ‘किराँती मर्ने हैन सर्ने’ बताउँदै बलियो बन्न सहयोग गर्ने बताए । उनी निकै मिलनसार व्यक्तित्व भएका एक आदर्श पात्र भएको उनले बताएका थिए । कार्यक्रममा नेपाल पत्रकार महासंघ काठमाडौं शाखा कार्यसमिति सदस्य रमेशकुमार बोहोराले दिवंगत राईको स्मृतिमा अक्षय कोष स्थापना गर्ने प्रतिबद्धता जाहेर गरेका छन् । उनले भने ‘आँखामा राख्दा पनि नबिजाउने मान्छे हुन् कमलजी ।’ कोभिडको समयमा धेरैलाई सहयोग गरेको, ट्रान्स्पोर्ट टिमलाई परिचालन गर्न उनले विशेष सहयोगसमेत गरेको स्मरण गरेका थिए । ‘धेरै कोभिड संक्रमितलाई बचाउने कमलजीलाई बचाउन असफल भएकोमा मलाई निकै दुःख लागेको छ’, उनले भने, ‘स्वर्गीय राईको स्मृतिमा आजीवन अक्षय कोषले सधैं उनले गरेको कामको सम्झना हुने र प्ररित गर्ने छ ।’

सभामा सामाजिक लोकतान्त्रिक पार्टीका नेता कुमार राईले भने, ‘राईको असमायिक निधनले समाजलाई निकै क्षति भएको बताए । उनको आत्माले शान्ति पाओस् । शोकमा परेकी उनकी पत्नीलाई ईश्वरले सान्त्वना दिऊन् ।’
सभामा दिवंगत राईकी जीवनसंगी लालसरा राईले दुःखको समयमा सान्त्वना दिने र सहयोग गर्ने सबैलाई आभार व्यक्त गरेकी थिइन् । उनले भनिन्, ‘उहाँका बाँकी रहेका सबै इच्छा पूरा गर्नु छ, आठ वर्षको यात्रामा मात्र उहाँ रहनुभयो मसँग’ । उनले कार्यक्रममा उनका बारेमा जीवनी पुस्तकका रूपमा प्रकाशन गर्ने बताइन् । कार्यक्रममा उनले प्रभाव पब्लिकेशनलाई निरन्तरता दिने अठोट पनि व्यक्त गरेकी थिइन् । उनले आफ्ना पतिको मृत्युपछि बजारमा प्रभाव पब्लिकेशन बन्द हुने हल्ला चलाइएकोमा असन्तुष्टि व्यक्त गरिन् । उनले बजारीया हल्लाको पछि नलाग्न पनि उनले सुझाव दिइन् । उनले आफ्ना पति दिवंगत राईले पढेको विद्यालयमा एक लाखको स्मृति कोष स्थापना गर्ने योजना रहेको बताइन् ।

कार्यक्रममा प्रतिष्ठानका अध्यक्ष डिकेन्द्र बहादुरले देशले एक होनहार पत्रकार र सम्पादक गुमाएको बताएका थिए । उनले शोकको घडीमा पनि अलिकति पनि विचलित नभई उनका काम र कर्तव्य निभाउन हरबखत सहयोग गर्ने प्रतिबद्धता जनाएका थिए ।