रमेशकुमार बोहोरा
काठमाडौं । राजनीति गर्न लेखपढ नगरे पनि हुन्छ भन्ने सोचाई छ । राजनीति गर्नेलाई पढ्ने फुर्सद नभएर पनि नपढेका भन्ने तर्क पनि छ । तर थोरैमात्र नेताले राजनीति र पढाइलाई सँगसँगै अघि बढाएका छन् तीमध्ये एक हुन् खानेपानीमन्त्री उमाकान्त चौधरी ।
चौधरीले त्रिभुवन विश्वविद्यालयबाट वनस्पतिशास्त्रमा एम्एस्सी गरेका हुन् । उनी कांग्रेसको १४ औं महाधिवेशनबाट सह–महामन्त्रीमा निर्वाचित भएका छन् । उनीसँग तेजुलाल चौधरीले प्रतिष्पर्धा गरे । विजेता चौधरीले तेजुलाललाई ८ सय ७९ मतले हराए । विजेता चौधरीले २७ सय ५६ मत पाए भने निकटतम प्रतिद्धन्द्धी चौधरीले १८ सय ७७ मात्र मत पाए । चौधरी सभापति शेरबहादुर देउवाको तर्फबाट उम्मेदवार भएका थिए । खानेपानीमन्त्री समेत रहेका उनी कांग्रेसको निवर्तमान केन्द्रीय सदस्य पनि हुन् । उनी अघिल्लो महाधिवेशनमा कृष्णप्रसाद सिटौलाको समूहबाट कोषाध्यक्षको उम्मेदवार बनेका थिए । कोषाध्यक्षमा पराजित चौधरीलाई सभापति देउवाबाट केही सातामै केन्द्रीय कार्यसमिति सदस्यमा मनोनीत गरेका थिए ।
उनले २०७४ को प्रतिनिधिसभाको निर्वाचन बाराबाट जितेका हुन् । विद्यार्थी आन्दोलनबाट नेपाल विद्यार्थी संघमा सक्रिय हुँदै आएका चौधरी जनताको माझ निकै लोकप्रिय छन् । जनताको हरेक सुखदुःखलाई नजिकबाट हेर्दै आएका उनले पार्टीको थप जिम्मेवारीलाई इमानदारिताका साथ वहन गर्ने बताएका छन् । ‘मलाई महाधिवेशन प्रतिनिधिले जुन विश्वासका साथ मतदान गर्नुभयो, त्यो भावनामाथि कहिल्यै पनि खेलवाड गर्दिन’ उनले भने ‘ मलाई एकातिर सरकारको जिम्मेवारी छ अर्कोतिर पार्टीको त्यतिमात्र होइन जनताले जिताएकाले क्षेत्रलाई पनि हेरिरहेको छु ।’ उनले पार्टीलाई गतिशील र जुझारु बनाउने आफूसँग प्रशस्तै योजना भएको बताएका छन् ।’ जनप्रतिनिधि हुँदा होस् वा बाहिर रहँदा जहाँ भए पनि उनले जनताबाट टाढा हुन नसक्ने बताएका छन् । उनी २ नम्बर प्रदेशको मात्र होइन केन्द्रको राजनीतिमा नै चर्चित व्यक्तित्व हुन् ।
२०५६ को प्रतिनिधिसभाको निर्वाचनमा बारा क्षेत्र नम्बर १ बाट प्रतिनिधि सभा सदस्यमा निर्वाचित उनी २०५८ सालमा कृषि तथा सहकारी सहायकमन्त्री बने । २०५९ सालमा नेपाली कांग्रेस प्रजातान्त्रिकको केन्द्रीय कार्यसमिति सदस्यमा निर्वाचित भए । २०६२÷०६३ को जनआन्दोलनमा आन्दोलन परिचालन समिति कमाण्डर भएर नै काम गरे । २०६४ सालमा नेपाली कांग्रेस र नेपाली कांग्रेस प्रजातान्त्रिक एकीकरणपछि कांग्रेस केन्द्रीय कार्यसमिति सदस्य भए । उनको जितको यात्रा कहिल्यै पनि रोकिएन । २०६४ सालको संविधानसभा निर्वाचनमा बारा क्षेत्र नं ५ बाट संविधानसभा सदस्यमा निर्वाचित भएपछि उनमा झन् जिम्मेवारी बढ्दै गयो ।
२०६७ सालमा माधवकुमार नेपाल नेतृत्वको संयुक्त सरकारमा कांग्रेसको तर्फबाट स्वास्थ्य तथा जनसंख्यामन्त्री बने । २०६७ सालको पार्टीको १२ औं महाधिवेशनमा केन्द्रीय कार्यसमिति सदस्यमा निर्वाचित भए । मन्त्री हुनेबित्तिकै देशभरको खानेपानीको अवस्था के छ भनेर बुझ्न जिल्ला दौडाहामा निस्केका छन् । ‘खानेपानी नपाएर कोही नछटपटाओस् भन्ने हो, देख्दा विषय सामान्य भए पनि इस्यू गम्भीर हो ’ उनले भने ‘ सबै जनतालाई स्वच्छ र सुलभ खानेपानी पु¥याउने मेरो योजना हो ।’ ‘पार्टीलाई गतिशील र जिवन्त बनाउने मेरो योजना हो, म सह–महामन्त्री भएपछि यो अभियानमा लाग्ने थप उर्जा प्रदान भएको छ’ सह–महामन्त्री चौधरीले भने । मन्त्री चौधरीले उपत्यकावासीलाइ छिट्टै मेलम्चीको पानी खुवाउने जनाएका छन् । उनले यो अभियानमा सहयोग गर्न सबैलाई आग्रहसमेत गरेका छन् ।