डिएनएफ संवाददाता

काठमाडौं । प्रमुख विपक्षी दल नेपाल कम्युनिस्ट पार्टी (एमाले)को दशौं अधिबेशन भोलि चितवनमा हुँदैछ । महाधिवेशनलाई मध्यनजर गर्दै अहिले धमाधम काम शुरु भइरहेको छ भने नेताहरुको आवागमन, स्वागतद्वार र सेल्फी प्वाइन्ट निर्माणलाई दिइएको तीब्रताले चितवन पुरै एमालेमय बन्ने भएको छ । पूर्व प्रधानमन्त्री एवं नेकपा एमालेका अध्यक्ष केपी शर्मा ओली पनि आज त्यसतर्फ जाँदैछन् ।

महाधिवेशन मूल ब्यबस्थापन समितिका संयोजक रामबहादुर थापा बादल  लगायतका एमाले नेताहरु चितवन पुगिसकेका छन् । एमालेको ऐतिहासिक अधिबेशनको उद्घाटन अध्यक्ष ओलीले शुक्रबार नारायणी नदि किनारमा उद्घाटन गर्ने कार्यक्रम रहेको छ ।

पाँच लाख सहभागी हुने भनिएको उद्घाटन सत्रका लागि नेता कार्यकर्ताहरु आउने जाने क्रम सुरु भइरहेको छ । चितवनमा बढ्दो भीडभाडका कारण सुरक्षा ब्यबस्था कडा पारिएको छ ।

एमाले बिभाजन गरेर माधवकुमार नेपालले नेकपा (एस) गठन भएपछि हुन लागेको पहिलो महाधिवेशन भएका कारण पनि एमालेले यसलाई  आफ्नो प्रतिष्ठाको बिषय बनाएको छ  । एमालेको महाधिवेशन तयारी देखेर अहिले नेकपा माओवादी केन्द्रसमेत झस्किन पुगेको छ।

अध्यक्ष ओलीको सत्ता बहिर्गमनपछि चौतर्फी घेराबन्दीमा रहेको एमालेको यो महाधिवेशनलाई राष्ट्रिय, अन्तर्राष्ट्रियस्तरमा चासोका साथ हेरिएको छ । एमाले महाधिवेशनमा यसपटक दुई हजार २७९ जना प्रतिनिधि सहभागी हुंने एमालेले जनाएको छ । यसअघि

 १ हजार ९ सय ९९ सहभागी हुने बताईए पनि पार्टी सदस्य बढेसँगै प्रतिनिधि संख्या बढेको प्रचार विभाग प्रमुख योगेश भट्टराईले बताए । उनले पदेन प्रतिनिधि २३८ र निर्वाचित प्रतिनिधि १,८७९ निर्वाचित भइसकेको जानकारी दिए। महोत्तरी, रौतहट र भुपू सैनिकबाट आउन बाँकी ६७ जना रहेको पनि उनले बताए।

महाधिवेशन प्रतिनिधिमा उत्पीडित दलित तर्फका १९५ र त्यसमा ६२ जना महिला रहेका छन्। अहिलेसम्म कुल महिला प्रतिनिधि ५७६ छन्। त्यसमा मनोनित र चयन हुन बाँकी ६७ जनाबाट पनि दलित र महिला सदस्य अझै थपिने बताइएको छ।

यसैबीच १०औं राष्ट्रिय महाधिवेशन उद्घाटनका दिन नारायणगढ र भरतपुर क्षेत्रका मुख्य सहरी क्षेत्रमा सवारीसाधन चल्न रोक लगाइने भएको छ । मानिसको चाप बढी हुने भएपछि व्यवस्थापन सहजका लागि सवारीसाधनमा रोक लगाइएको बताइएको छ ।

प्रमुख जिल्ला अधिकारी असमान तामाङका अनुसार नारायणीको पुल, बाह्रघरे, बेलचोक, त्रिचोक, केन्द्रीय बस ट्रमिनल, बाइपास सडक र आँपटारी क्षेत्रभित्रका सडकमा सवारीसाधन सञ्चालनमा रोक लगाइने भएको हो । बिहान ९ देखि साँझ ५ः३० बजेसम्म सवारीसाधन सञ्चालनमा रोक लगाइनेछ । मानिसको चाप धेरै भएको ठाउँमा सवारीसाधनसमेत चले दुर्घटना हुन सक्ने भएकाले पूर्वतयारीका साथ सावधानी अपनाइएको उनले बताए ।

आयोजकले २० स्थानमा डिस्प्ले बोर्ड राख्ने भएकाले सहभागीले गाडी रोकिने ठाउँ आसपासका बोर्डबाट समेत कार्यक्रम हेर्न पाउनेछन् । तामाङले भने, ‘यसले गर्दा कार्यक्रमस्थलको भीड कम हुन्छ ।” जिल्ला प्रहरी कार्यालयका प्रमुख प्रहरी उपरीक्षक ओमप्रसाद अधिकारीका अनुसार सो दिन सुरक्षा प्रबन्धको सबै खालको व्यवस्थापन गरिएको छ ।

गाडी रोकिने नाकाहरुमा सुरक्षाकर्मी रहेर सुरक्षाको व्यवस्था गर्ने छन् । महाधिवेशनको उद्घाटन स्थल नारायणी नदी किनारमा बनाइएको छ ।