रमेश कुमार बोहोरा
काठमाडौं । प्रधानमन्त्री शेरबहादुर देउवा सुस्त गतिमा अघि बढिरहेका छन् । उनले सरकारलाई कम प्राथमिकता दिएका छन् । उनले सरकारलाई भन्दा पनि पार्टीलाई प्राथमिकता दिँदै काम गरेका छन् ।
देउवाले पाँचौं पटक सत्ता आरोहण गरिरहँदा सर्वसाधरण मानिस भने खासै खुशी थिएनन् किनभने देउवाको यसअघिको कार्यकाल पनि त्यति सन्तोषजनक नभएकाले यो कार्यकाल पनि त्यति अपेक्षाकृत हुन सकेको छैन । देउवाले सरकार चलाएको १ सय १० दिन भइसकेको छ । उनले कुनै त्यस्ता नयाँ काम गर्न सकेनन् तर सँगसँगै उनले त्यस्तो बिगारेका पनि छैनन् । देउवा कमैमात्र बोल्ने भएकाले देउवा निवर्तमान प्रधानमन्त्री केपी शर्मा ओलीजति आलोचित भएका छैनन् । हत्तपत्त नबोल्ने गरेकाले नै देउवा ओलीजति विवादित बनेका छैनन् । सामान्य कुरामा पनि जवाफ फर्काइहाल्ने र आफ्नो विरोधमा बोलेको सहनै नसक्ने ओलीको कार्यकालमा केही काम भए पनि उनको अनावश्यक र हावादारी गफले गर्दा ती सबै काम पनि ओझेलमा परेका छन् । ओली ४० महिना २५ दिन प्रधानमन्त्री भए । पार्टीभित्रको विवाद मिलाउन नसक्दा उनको सरकार असार २८ गते ढलेको छ ।
ओलीको प्रधानमन्त्रीको पदमात्र गएन । उनको व्यवहारका कारण केही प्रदेश सरकार पनि ढल्न पुगे तर ओलीले यसलाई सामान्य रुपमा लिएका छन् । ओलीले आगामी निर्वाचनमा एमालेले बहुमत ल्याउने र सरकार चलाउने दाबी गर्दै आएका छन् । झण्डै दुई तिहाई नजिकको मत दिँदा पनि सरकार चलाउन नसकेको र आन्तरिक विवाद सिर्जना गरेर राजनीति नै अस्तव्यस्त बनाएको आरोप ओलीमाथि अझै छ । ओलीले केही दिनअघि आफ्नो नेतृत्वको सरकारले गरेको कामले गिनिजबुक आधा भरिन्छ भनेपछि अर्को वहस चलेको छ । उनले आफ्नो सरकारले धेरै काम गरेको दाबी गर्दै आएका छन् । धेरैजसोले भनें ओलीले गरेका नकारात्मक कामले गिनिजबुक भरिन्छ भनेर पनि टिप्पणी गरेका छन् । ओलीले गिनिजबुककै बद्नाम गर्न खोजेको भनेर आरोप लगाउनेको संख्या पनि कम छैन । ओलीले विश्वका कुनै मुलुकमा सर्वोच्चको परमादेशका आधारमा प्रधानमन्त्री नबन्ने भन्दै आफूले दुइपटक गरेको प्रतिनिधिसभा भंगको बचाउ गर्दै आएका छन् । संविधानविपरीत गतिविधि गरेकाले सरकार ढलेको र पार्टीसमेत संकटमा परेको यथार्थलाई ढाकछोप गर्न ओली दिलोज्यान दिएर लागेका छन् ।
प्रधानमन्त्री देउवाले कहिल्यै पनि अनावश्यक तर्क गरेर जनतामा भ्रम पैदा गरेका छैनन् । प्रधानमन्त्री बढी भएको हिसावले हेर्ने हो भने ओलीभन्दा देउवा बढीपटक प्रधानमन्त्री भएका छन् । प्रधानमन्त्री भएको गणना गर्ने हो भने ओलीभन्दा देउवाले गिनिजबुकमा नाम लेखाउन सक्छन् तर उनले अहिलेसम्म त्यस्तो तर्क गरेका छैनन् ।
ओलीले गिनिजबुकको प्रसंग उठाएपछि उनी त्यसको जवाफ दिँदादिँदै हैरान भएका छन् । ओली जहाँ गए पनि पत्रकारले यही प्रश्न गर्ने गरेका छन् तर ओलीले चित्तबुझ्दो जवाफ दिनुभन्दा पनि टारटुर गरेर अल्मल्याउन गरेका छन् ।