काठमाडौ । गोरखाको भिमसेन थापा गाउँपालिकाको वडा नम्बर २ को इकाई अधिवेशन पुनः गर्न माग गर्दै स्थानीय काङ्ग्रेसी नेताले जिल्लाको निर्वाचन समितिसंग माग गरेका छन् ।
रबिलाल भट्ट, शंकर लामिछाने, देवेन्द्रराज अगाई, नारायण सोडारी र कृष्णप्रसाद भट्टले वडा अधिवेशनमा धाधली भएको भन्दै पुनः अधिवेशन गर्नुपर्ने माग गरेका छन् । उनीहरुले शुक्रबार एक विज्ञप्ती प्रकाशित गरी अधिवेशन निश्पक्ष नभएको र प्रशासनको बलमा एकलौटी गरिएको आरोप लगाएका छन् । उनिहरुले पार्टीको विधान र निर्वाचन निर्देशिकाविपरीत निर्वाचन भएको उल्लेख गरेका छन् ।
उनीहरूले निर्वाचन कार्यक्रम पनि प्रकाशन नगरेको र बीच बाटोबाट मनोमानी ढंगले प्रतिनिधिको नाम समावेश गरेको आरोप लगाएका छन् । उनीहरूले अपांग कोटाबाट आउनुपर्ने क्षेत्रीय प्रतिनिधिको अपांग परिचयपत्र नभएको , सरकारी तथा अर्ध सरकारी निकायमा कार्यरतलाई क्षेत्रीय प्रतिनिधि छनौट गरेको, खस आर्य कोटामा २ जना पुरुष र १ महिला हुनुपर्नेमा सबै पुरुष चयन गरिएको , जनजातिको महिला कोटा खाली पठाएको , प्रतिनिधि छनौट भएर आएका नवराज पान्डेको ठाउँमा उनको नामको सट्टा हरिप्रसाद पान्डे बनाएको भन्दै जिल्ला निर्वाचन कार्यालयमा उजुरी दिएका हुन् ।
उनीहरूले प्रशासनको आडमा धाधलीपूर्ण निर्वाचन भएकोले उक्त निर्वाचन बदर गरी पुनः निर्वाचन गर्न माग गरेको जनाएका छन् ।