एजेन्सी

फुटबलमा प्रतिद्वन्द्वीको चर्चा हुँदा इङ्ल्याण्ड र जर्मनीको नाम पनि आउने गर्दछ । दुई टोलीबीचको खेलले धेरै सम्झनलायक पलहरु दिएका छन् । यूरो २०२० को क्वार्टरफाइनलमा स्थान बनाउनका लागि मङ्गलबार दुई टोलीले यस प्रतिद्वन्द्वीतामा नयाँ अध्याय थप्ने छन् । सन् २०१४ को विश्व विजेता जर्मनी पछिल्ला वर्षहरुमा इङ्ग्ल्याण्डमाथि हाबी हुँदै आएको छ । तैपनि फुटबल फ्यानहरुले यो खेललाई निकै रुचीका साथ पर्खिरहेका छन् ।

इङ्ग्ल्याण्डका फ्यानहरुले पक्कै पनि सन् २०१० को विश्वकपमा दुई टोलीबीच भएको खेल सम्झन चाहनन् । दक्षिण अफ्रिकाको ब्लोएमफोन्टिएनमा भएको खेलमा जर्मनी ४–१ ले विजयी भएको थियो । जे नतिजा आए पनि उक्त खेलले सदाका लागि फुटबलको भविष्य बदलेको थियो ।

उक्त खेललाई फ्रांक लाम्पार्डको ‘घोष्ट गोल’ का लागि सम्झिने गरिन्छ । त्यही गोलका कारण आधुनिक फुटबलमा गोल लाइन प्रविधिको सुरुवात भएको थियो ।

खेलमा जर्मनीले २–१ को अग्रता लिइरहेको अवस्थामा इङ्ग्लिस मिडफिल्डरले गोलकिपर म्यानुअल नुयरलाई चिप गर्दै टोलीका लागि बराबरी गोल गरेको सोचेका थिए । क्रसबारमा लाग्दै बलले गोल लाइन पार पनि गर्यो । तर खेल अफिसियलले त्यसलाई देखेनन् र गोल दिएनन् । अन्ततः खेल इङ्ग्ल्याण्डले गुमायो ।

उक्त गल्तीका कारण इङ्ग्ल्याण्डमा फिफाको निकै आलोचना भयो । फुटबलको नियामक निकाय माफी माग्न बाध्य भयो भने खेलमा गोल लाइन प्रविधिका लागि ढोका खुल्यो ।

सन् २०१४ को विश्वकपमा फिफाले गोललाइन प्रविधि लागू गरिसकेको थियो भने सन् २०१८ को संस्करणमा आइपुग्दा अझ उन्नत भिडियो एसिस्टेन्ट रेफ्री (भीएआर) को प्रयोग गरिएको थियो ।

‘यसले खेलमा सकारात्मक परिवर्तन गर्यो,’ लाम्पार्डले भनेका थिए, ‘गोल लाइन प्रविधि खेलका लागि सकारात्मक कदम हो ।’

स्रोत : सिएनएन