काङ्ग्रेस नै अन्तिम विकल्प हो भन्ने जनताले बुझिसकेः कांग्रेस नेता शाही
काठमाडौं । नेपाली कांग्रेस जुम्लाका सचिव लक्ष्मण शाहीले पार्टीले चलाएको ‘घरघर जाऔं, कांग्रेस जिताऔं’ अभियान प्रभावकारी भएको बताएका छन् । उनले निर्वाचन लक्षित यो कार्यक्रमबाट गाउँमा जनता उत्साहित भएको र कांग्रेसप्रति थप विश्वास बढेको स्पष्ट पारे ।
‘ अभियान धेरै उपलब्धीमूलक छ, अबको विकल्प कांग्रेस नै हो भन्ने बुझाउन सफल भएका छौं’ उनले भने ‘ कांग्रेस के हो र यसले हिजो के गरेको थियो र भोलि के गर्छ भन्ने बुझाइयो भनें धेरै कुरा गर्नै पर्दैन ।’ उनले विपक्षीहरुले सरकारले चुनाव गराउँदैन कि भनेर आलोचना गरिरहेका बेला घोषणा भएको र प्रक्रियामा अघि बढेको निर्वाचनले नेता तथा कार्यकर्तामा उत्साह थपिएको उल्लेख गरे ।

‘लोकतन्त्रलाई स्थापित गर्न र संविधानको रक्षा गर्न पनि निर्वाचन अपरिहार्य छ, अब देश चुनावमय भइसक्यो’ उनले जुम्लाबाटै भने ‘ निर्वाचनमा जान कुनै पनि पार्टी डराउनु् हुँदैन ।’ उनले जित र हारको कुरालाई लिएर कसैले पनि निर्वाचन भाँड्न नहुने बताए ।’ उनले सबै नेता तथा पार्टीका कार्यकर्तालाई एकताबद्ध भएर निर्वाचनको तयारीमा लाग्न आग्रह गरेका छन् ।
सरकारले माघ २४ गते आगामी वैशाख ३० गते स्थानीय तहको निर्वाचन गर्ने निर्णय गरेपछि देशव्यापी रुपमा नेता तथा कार्यकर्ताहरु उत्साहित भएका छन् । शाही गत निर्वाचनमा कांग्रेसको तर्फबाट हिमा गाउँपालिकाको अध्यक्षको उम्मेदवार भएका थिए । निर्वाचन हारे पनि उनी जनताबाट कहिल्यै टाढा भएनन् । उनले आफू पदमा भए पनि नभए पनि सधैं गाउँवासी, जिल्लावासी र देशवासीको सेवा गर्ने जनाएका छन् । उनले कोरोना संक्रमणको सबै चरणमा जिल्लामा मास्क, सेनिटाइजर वितरण गर्नुका साथै स्वास्थ्य सचेतना पनि बाँडेका थिए । उनले जनता प्रमुख कुरा भएकाले सधैं दुःखमा सहयोग गर्ने र सुखमा हाँस्ने बताएका छन् । सचिव शाही जिल्लाका विभिन्न कार्यक्रममा पनि सहभागी भएका छन् । विभिन्न पुरस्कार वितरणका साथै पार्टी सदस्य बनाउन पनि सक्रिय छन् । गाउँघरमा जाँदा स्थानीयले उनलाई फूलमाला लगाएर स्वागत पनि गरेका छन् । उनले केही समयअघि हिमा गाउँपालिका –१ बड्कीमा रहेको कालिका माविलाई शैक्षिक सुधारको लागि भन्दै १ लाख ५१ हजार १ सय ५१ रुपिँया उपलब्ध गराएका छन् ।
उनले कांग्रेसले पार्टीभित्रको आन्तरिक द्धन्द्धलाई व्यवस्थापन गर्दै निर्वाचनमा जानुपर्ने बताएका छन् । ‘कांग्रेस कतै पनि कमजोर छैन तर कहिलेकाहीँ आन्तरिक रुपमा नै संकट देखिन्छ भोलिको दिनमा त्यसलाई ख्याल गर्नुपर्छ’ उनी भन्छन् ।