काठमाडौं । जन समाजवादी पार्टी नेपालका उप महासचिव तथा प्रवक्ता डम्बरविक्रम कार्कीले एमसीसी पारित गरेर नेताहरु भाग्ने ठाउँ नभएको बताएका छन् ।
उनले राष्ट्रघाती सम्झौता पास गरे आफूहरु पनि चुप लागेर नबस्ने बताएका छन् । उनले अमेरिकाको पछि लागेर देशको राष्ट्रियता, सार्वभौमिकता माथि प्रहार गर्ने अधिकार कुनै पनि नेतालाई नभएको बताएका छन् । उनले एमसीसी पारित भएपछि नेपाल र नेपाली भन्ने अवस्था नै नरहने समेत स्पष्ट पारेका छन् । ‘सकेसम्म हामी एमसीसी पारित गर्न दिनेछैनौ यदी झुक्याएर गरिहाले भने पनि ती नेताहरु कहाँ भाग्लान् र ?’ उनी भन्छन्– राष्ट्रघाति सम्झौता छ भन्ने बुझिबुझी पनि एमसीसी पास हुन्छ भने नेताहरुलाई हामी निगरानी गर्छौ, पक्कै पनि उनीहरु त चन्द्रमामा त गएर बस्ने होइनन् होला नि ?’ कार्कीले आफूहरु निरन्तर संघर्ष गरिरहेको समेत बताएका छन् । पार्टीसहित अन्य विभिन्न संघसंस्थाहरुको आयोजनामा उपत्यकामा एमसीसीविरुद्ध संघर्ष हुँदै आएको छ । पटक पटक प्रहरीले पक्राउ गरेर आन्दोलनलाई निस्तेज पार्न खोजे पनि उनीहरु चुपचाप लागेका छैनन् । अमेरिकाले आफ्नो निहीत स्वार्थ पूरा गर्न एमसीसी परियोजना अघि बढाएको उनको भनाई छ । अमेरिकाले दिने पैसा बरु जनताले उठाएर सरकारलाई दिने पनि उनको दाबी छ । एमसीसी पारित भएपछि नेपाल विखण्डन हुने र नेपालको कानूनभन्दा अमेरिकाको कानून नै लागू हुने भएकाले पनि खतरा भएको उनको ठम्याई छ । अमेरिकाले एमसीसीको माध्यमबाट नेपालमा प्रवेश गर्न खोजेको र त्यसले दीर्घकालीन रुपमा असर पर्ने भन्दै उनीहरु पटक पटक संघर्ष गर्दै आएका छन् ।
कार्कीले नेताहरु अमेरिकाको इशारामा चलेको र उनीहरुकै दलाली गरेर आफ्नो जीवनयापन गर्दै आएको पनि बताएका छन् । ‘यसअघि पनि विदेशी सहयोग आएको थियो, त्यसबाट कुन जनताले के पाए र जनताको जीवनस्तर कहाँ सुध्रियो सबैभन्दा पहिले सरकारले यो जवाफ दिनुपर्छ ।’ उनले भने– एमसीसी राम्रो हो भने के कारणले राम्रो हो र जनताले के पाउँछन् भन्ने प्रष्ट रुपमा सरकारले बुझाउनु प¥यो ।’ कार्कीले एमसीसीको नाममा नेताहरुले ठूलो रकम बुझ्दै आएको र एमसीसी पारित भए त्यो रकम निरन्तर आउने भएकाले पनि जबरजस्ती रुपमा एमसीसी पारित गराउन नेताहरु लागि परेको बताएका छन् ।