काठमाडौं । १९ वर्षे पाकिस्तानी आरोही सहरोज कासिफले सगरमाथाको सफल आरोहण गरेका छन् । उनले गत वैशाख २८ गते विश्वको सर्वोच्च शिखर सगरमाथाको सफल आरोहण गरेका हुन् ।
सफल आरोहणसँगै उनले राष्ट्रिय किर्तीमान समेत राखेका छन् । १९ वर्षको उमेरमा सगरमाथाको शिखरमा पाइला राख्दै पाकिस्तानीमध्ये कम उमेरमा विश्वको सर्वोच्च शिखर पुग्ने पहिलो नागरिक बनेका छन् उनी । आरोहणपश्चात उनले खुशी हुँदै उनले भने ‘म यो सफलताबाट निकै खुशी छु, आठ वर्षअघि देखिको सोचले अहिले सार्थकता पाएको छ ।’
सगरमाथा चढ्ने सबैभन्दा कान्छा पाकिस्तानी सहरोज कासिफले नेपाल र पाकिस्तानको हिमालले दुई देशको सम्बन्धलाई बयान गर्ने बताए । आरोही कासिफले सगरमाथाको सफल आरोहणपछि नेपाल र नेपालीले देखाएको माया र सद्भावको खुलेरै प्रशंसा गरेका छन् । उनी कासिफ सेभेन समिट कम्पनीमार्फत सगरमाथा आरोहणमा सामेल भएका थिए ।