काठमाडौं । ईलाका प्रहरी कार्यालय गजुरीमा कार्यरत प्रहरी निरीक्षक (इन्स्पेक्टर) भोजराज पाण्डेयलाई सम्मानसहितलाई विदाई गरिएको छ । डेढ वर्षदेखि त्यहाँ कार्यरत उनलाई स्वास्थ्य मापदण्डको परिधिभित्र रही ईलाका प्रहरी कार्यालयले विदाई गरेको हो । उनको महानगरीय प्रहरी वृृत्त चापागाउँ ललितपुरमा काजको रुपमा सरुवा भएको छ ।
बिदाई कार्यक्रममा कार्यालयको तर्फबाट मायाको चिनो दिइएको थियो । उनले आफ्नो कार्यकाल सफलतापूर्वक सम्पन्न गरेकोमा समेत बधाई दिँदै भावी कार्यकालको सफलताको शुभकामना व्यक्त गरिएको थियो । गजुरीमा कार्यरत रहेको अवधिमा उनले पाएको यो सम्मन पाँचौ पटकको हो । उनले यसअघि दुई पटक सोही कार्यालयबाट एक– एक हजार नगद पुरस्कार, प्रदेश प्रहरी कार्यालय हेटौंडाबाट अभिलेखमा जनिने गरी नगद रुपैंयाँ दुई हजार र २०७७ सालको मंसीर महिनाको धादिङ जिल्लाको उत्कृष्ट प्रहरी अधिकृतको रुपमा घोषित भई सम्मान पाएका थिए । उनी अपराध अनुसन्धानमा विशेष दखल राख्ने र अनुसन्धानलाई टुंगोमा पुर्याउने सफल इन्स्पेक्टरको रुपमा चिनिन्छन् ।
सफलतापूर्वक अनुसन्धान गरेको कारण संघीय प्रहरी कार्यालय बागमतिबाट उत्कृष्ट अनुसन्धान अधिकृतको रुपमा प्रहरी प्रधान कार्यालयमा सिफारिस समेत भएका छन् । कानुन कार्यान्वयनको सवालमा कोही कसैसँग सम्झौता नगर्ने खरो स्वभावका उनी कानुनका विद्यार्थीसमेत हुन् । उनको कार्यकाल राम्रो भएको र स्थानीयले राहत महसुश गरेका कारण उनको विदाई भएपछि स्थानीयहरुले एउटा कुशल प्रहरी निरीक्षकलाई आफूहरुबाट विदाई गरेको महसुश गर्न थालेका छन् ।