काठमाडौं । राप्रपाका प्रमुख नेताले नै गर्न नसकेको काम पार्टीका केन्द्रीय सदस्य नविन शाहीले गरेर देखाइदिएका छन् ।
राजनीति र समाजसेवामा सक्रिय बन्दै आएका शाहीले शनिवार कालिमाटीमा आयोजित काठमाडौं महानगरपालिका वडा नम्बर १३ को वडा समिति गठनमा उत्साहजनक ढंगले मानिसको सहभागिता गराएका थिए । स्थानीय व्यापारी, समाजसेवी र विभिन्न संघसंस्थामा आवद्धहरुलाई पनि उनले राप्रपाको विचार र सिद्धान्तमा लाग्न आग्रह गरेका थिए । ‘मैले सबैसँग स्पष्ट रुपमा कुरा गरें, मेरो प्रतिबद्धतालाई स्विकार्दैै उहाँहरु पार्टीमा आउनुभएको छ’ नेता शाहीले भने ‘ अहिले आफूलाई प्रमुख पार्टी भनेर दाबी गर्नेहरुका अब दिन गए, उनीहरुबाट जनता वाक्कदिक्क भइसकेकाले नै राप्रपा सबैको रोजाइमा परेको छ ।’
नेता शाहीले राप्रपाका प्रमुख नेताहरुले आयोजना गरेको कार्यक्रममा पनि आफूले उपस्थित गराएजस्तो मानिस नहुने पनि दाबी गरेका छन् । उनले सयौंको संख्यामा पार्टी प्रवेश गरेको पनि बताएका छन् । पूर्वमन्त्री तथा पार्टीका नेता विक्रमबहादुर थापाले उनीहरुलाई फूलमाला र अविर लगाएर पार्टी प्रवेश गराएका हुन् । पार्टी प्रवेश गर्नेहरुले आगामी दिनमा पार्टीको पक्षमा सक्रिय रहेर काम गर्ने प्रतिबद्धता जनाएका छन् । वडा समिति पनि निर्विरोध निर्वाचित भएको छ ।
नेता शाहीले पार्टीको वैशाखमा हुने महाधिवेशनले पार्टीलाई थप बलियो र सशक्त बनाउने बताएका छन् । ‘हाम्रो पार्टीको अब हुने महाधिवेशन विशेष प्रकारको हुने छ, पार्टीले उठाएका एजेण्डाले अब हुने संसदीय, प्रदेश र स्थानीय तहको निर्वाचनलाई लक्षित गर्ने छ’ उनले भने ‘राप्रपाप्रति जनताको विश्वास घटेको छैन, भइरहेको विश्वासलाई बचाउन सकियो भनें पनि पार्टी यो देशको वैकल्पिक र निर्णायक शक्ति बन्ने छ ।’