कपिलवस्तुं । राष्ट्रिय स्वतन्त्र पार्टी रास्वपाका सभापति रवि लामिछानेले रक्सी–मासुमा भोट बेच्नेवाला नभएर सचेत नागरिक हुँ भनेर कसम खाएर चार वर्ष टिकाउनुहुन्छ ? भनेर प्रश्न गरेका छन् । शनिबार कपिलवस्तुको जितपुरस्थित बुद्ध रंगशालामा रास्वपाको खुलासभामा उनले जनताले परिवर्तनको कसम खाए र चार वर्ष प्रतिवद्ध रहे मुलुक परिवर्तन हुने बताए ।

‘म शक्तिशाली जनता हुँ, दास होइन । नोकर होइन । म लोभी होइन । रक्सी–मासुमा भोट बेच्नेवाला होइन । म सचेत नागरिक हुँ भनेर कसम खान सक्नुहुन्छ ? र, त्यो कसम चार वर्ष टिकाउन सक्नुहुन्छ ? सक्नुहुन्छ भने यो देशमा परिवर्तन कसैले पनि रोक्न सक्दैन,’ उनले भने ।

एक कार्यकाल बहुमतको सरकार चलाएर आफूले भनेका कुरा पूरा गर्न नसके राजनीतिबाटै अलग हुने उनले घोषणा गरे । सभापति लामिछोनले ‘राम्रो गरुन्जेल घण्टी बजाउनुस् । नराम्रो गर्दा घण्टीले हामीलाई नै बजाइदिनुस्’ पनि भने ।

उनले षड्यन्त्रले आफ्नो आवाज रोकियो भने पार्टी बनाउने जिम्मा जनतालाई दिने बताए । ‘कुनै षड्यन्त्रले यो आवाज रोकियो भने, यात्रा रोकियो भने पार्टी बनाउने जिम्मा तपाईं जनतालाई दिन्छु । किनकि, एउटा मान्छेले गरेर केही पनि हुँदैन, धेरै मान्छे चाहिन्छ,’ उनले भने ।

सभापति लामिछानेले देशलाई घात गर्ने र र जनतालाई ठग्ने एउटा पनि काम नगरेको बताए । ‘शक्तिको दुरुपयोग गरी झुटा र अनर्गल प्रचार गरेर मलाई कसैले कमजोर बनाउन सक्दैन, प्रयास नै नगरे हुन्छ,’ उनले भने ।