काठमाडौं । पश्चिम र मध्यपश्चिमको भ्रमणमा रहनुभएका पूर्वराजा ज्ञानेन्द्र बिर बिक्रम शाहको भोलि भैरहवामा नागरिक अभिनन्दन गरिने भएको छ।

धार्मिक भ्रमणका लागि पुस ८ गते त्यसतर्फ प्रस्थान गर्नुभएका पूर्वराजा ज्ञानेन्द्रलाई ११ दिनपछि भैरहवाको सुगरमिलमा नागरिक अभिनन्दन गर्न लागिएको हो। पूर्वराजाको अभिनन्दनको तयारीका लागि यसअघि नै एमाले नेता डा. रामप्रसाद बस्यालको संयोजकत्वमा मूल समारोह समिति गठन गरिएको थियो ।

गत स्थानीय निर्वाचनमा एमालेकातर्फबाट सिद्धार्थनगर नगरपालिकाको नगर प्रमुख पदमा उम्मेदवार समेत रहेका भैरहवाका पुराना वामपन्थी नेता बस्याल एमालेको लुम्बिनी प्रदेश कमिटी पूर्वसल्लाहकार हुन् । समितिले अभिनन्दनका लागि तयारी पूरा भएको जनाएको छ। नागरिक अभिनन्दन ग्रहणपछि पूर्वराजा ज्ञानेन्द्रले कार्यक्रमलाई सम्बोधन गर्ने बताईएको छ ।

पूर्वराजा ज्ञानेन्द्रले गत शनिबार कपिलवस्तुको शिवराज नगरपालिका–३ खैरेन्द्रपुर चौराहामा निर्माण गरिएको पृथ्वीनारायण शाहको सालिक अनावरण गर्नुभएको थियो ।

शालिक अनावरणका लागि कार्यक्रममा पुग्नुअघि पूर्वराजा शाहलाई जिल्लाको दोहनी, गैडाहवा, बहादुर गन्ज लगायतका स्थानमा स्थानीयले भब्य स्वागत गरेका थिए । सो अवसरमा पूर्वराजा शाहले नागरिक अभिनन्द समेत ग्रहण गर्नुभएको थियो।

भैरहवामा गरिने नागरिक अभिनन्दन समारोहमा पूर्वरानी कोमल राज्यलक्ष्मी शाह,पूर्व नवयुवराज हृदयेन्द्र लगायत राजपरिवारका अन्य सदस्यहरुको समेत सहभागिता रहने मूल समारोह समितिले जनाएको छ।