कृष्णा कुमारी खड्का, कलाकार

० अचेल के गर्दै हुनुहुन्छ ?
– कलाकारिता क्षेत्रमा लागेकीले आज भोलि म टेलिसिरियल, सर्टमूभी, म्युजिक भिडियोमा व्यस्त छु ।
० कलाकारिता क्षेत्रमा कहिलेदेखि लाग्नु भयो ?
– म २०६६ सालदेखि कलाकारिता क्षेत्रमा लागेकी हुँ ।
० कलाकारिता क्षेत्रमा कसको प्रेरणाबाट लाग्नु भयो ?
– म मेरो आफ्नो इच्छा र रहरले यो क्षेत्रमा आएकी हुँ ।
० यस क्षेत्रबाट यहाँलाई कत्तिको आत्मसन्तुष्टि मिलेको छ ?
– यो क्षेत्रमा आउँनको लागि मेरो अगाडि पछाडि कोही थिएन । म स्वत आफ्नै इच्छाले स्वविवेकले लागेको हुँ । जे होस यश क्षेत्रबाट आत्म सन्तुष्टि नै हो ।
० यहाँको विचारमा कलाकारिता क्षेत्र भनेको के हो ?
– मेरो बिचारमा कलाकरिता क्षेत्र भनेको आफू रोएर पनि अरुलाई हँसाउँने, नचाउँने र आफू मरेपछि पनि जीवितै रहने एउटा मन्दिर हो ।
० यहाँले अहिलेसम्म कुन–कुनमा अभिनय÷भूमिका निभाउनु भयो ?
– मैले ठूलो पर्दामा रंग बैजनी, कोरोना, समाली राख है, चोर पुलिस, छक्का पन्जा र अन्य धेरै चलचित्रमा काम गरे ।
० यहाँले अभिनय गर्नुभएको मध्ये कुनमा सबभन्दा बढी आत्म सन्तुष्टि मिलेको छ ?
– गर्न त मैले धेरै टेलिसिरियल र म्युजिक भिडियोमा काम गरें तर मलाई चिनाउने टेलिफिल्म कान्छी, भुन्टि, सौतेनी आमा लगायत अन्य धेरैमा सन्तुष्ट र खुशी छु ।
० यहाँले सँगै अभिनय गर्नु भएको मध्येमा कोसँग अभिनय गर्दा सबभन्दा बढी खुशी मिलेको छ ?
– मैले सँगै अभिनय गर्ने क्रममा आशा खड्का, टंंक खड्का, शिव शर्मा, शितल के.सी., रामचन्द्र अधिकारी, रमा थपलिया र लक्ष्मण बस्नेतलगायतसँग खुशी मिलेको छ ।
० यहाँले अभिनय गर्नु हुँदा सबभन्दा बढी कुन भूमिकामा अभिनय गर्नु भएको छ ?
– मैले सबै भन्दा बढी छुच्ची सासुको भूमिकामा अभिनय गरेकी छु ।
० कलाकारिता क्षेत्रलाई राज्यले कुन रुपमा हेरेको पाउनु भएको छ ?
– कलाकार राज्यको गहना भनिन्छ, तर कलाकारहरुलाई राज्यले कुनै पनि सेवा सुबिधा दिएको छैन ।
० कलाकारिता क्षेत्रलाई राज्यले के के गरिदिएमा राम्रो हुन्थ्यो जस्तो लाग्छ यहाँलाई ?
– कलाक्षेत्रमा राज्यले थोरै बजेट छुट्टयाएर लगानी गरेर रोजगार दिए कुनै कलाकार विदेश पलायन हुनुपर्ने थिएन र औषधि उपचार नपाएर अकालमै मर्नुपर्ने थिएन जस्तो लाग्छ ।
० यस क्षेत्रमा लाग्नु भई अभिनय गर्दाको कुनै अविस्मरणीय क्षण छ कि ?
– बुहारी सुत्केरी भएको बेलामा ढाँटेर गएको र पछि साथीले फोटो हालेर बुहारीले थाहा पाएर गाली खाएको र मलेसियामा स्टेज चढ्दा फुलि खसेर बिराज भट्टले जिस्क्याएको क्षण कहिल्यै भुल्न सक्दिन ।
० यहाँले गीत पनि गाउनु भएको छ, यस विषयमा केही प्रष्ट्याई दिनुहोस न ।
– मेरो पहिलो गीतको यात्रा मेरो मनको राजा र मेरि आमाको सम्झनामा आफ्नै कहानीमा र तिजको गीत सासू बुहारी,भजन बिर्से छोराछोरीले बोलको गीत साथै अन्य धेरै प्रत्येक्ष दोहोरी र अन्य धेरै गीतहरुमा निरन्तर काम गर्दैछु ।
० कलाकारिता क्षेत्र र गायन क्षेत्रमा के फरक पाउनु भयो ?
– कलाकरिता क्षेत्र र गायन क्षेत्र फरक छ तर मलाई दुबै मन पर्छ । साथै रमाइलो लाग्छ ।
० अन्तमा  आफूलाई मनमा लागेका र भन्न छुटेका केही छ कि ?
– मैले कलाकारिता क्षेत्र बाहेक सामाजिक काम पनि गरेको छु, भुकम्पमा राहत बाड्न मेलम्ची गयौं, पहिरो जाँदा पनौतीमा देबकी सिग्देललाई खाने पानी खाद्यान्न र ४० वर्षदेखि पनौतीमा बेवारिसे हमालका परिवारलाई उद्दार गरेर रिमा सेवा समाज ल्याएको थिएँ । मैले ठूलो ठूलो आर्थिक सहयोग गर्न नसके पनि आफ्नो गाँस काटेर कसैको नाङ्गो भोको देख्न सकिन, चाहिन र सकेको सहयोग गर्दै आईरहेको छु ।