काठमाडौं । शुक्रवार भक्तपुरस्थित आफ्नै निवासमा पत्रकार सम्मेलन गर्दै दुर्गा प्रसाईंले कुनै दिन आफूले प्रधानमन्त्री पुष्पकमल दाहाल ‘प्रचण्ड’लाई नजरबन्दमा राख्नु नपरोस् भन्दै चेतावनी दिएका छन्। ‘कतै मैले एक दिन तपाईँलाई पनि नजरबन्दमा राख्न नपरोस्। यो कुरा तपाईँ हेक्का राख्नुहोस्,’ उनले भने।

उनले आज आफूलाई नजरबन्दमा राखिएको र दिनभर घरमा बिजुलीको लाइनसमेत काटिएको बताए। उनले भने,’दिनभर मेरो घरको बिजुलीको लाइन काटियो। प्रचण्ड ज्यू तपाईँलाई जंगलबाट यो ठाउँमा पुर्‍याउने दुर्गा प्रसाईँ हो। दुर्गा प्रसाईँले ज्यान दिएको छ। यही घरमा हो तपाईँले कुनै दिन चिया खाएको। यही घर तपाईँले आज अन्धकार बनाउनुभएको छ।’