काठमाडौं । अविरल वर्षापछि काठमाडौं उपत्यका आसपासका नदी तथा खोलाहरूमा जल सतह खतराको बिन्दुमा पुगेको छ ।

जल तथा मौसम विज्ञान विभागका अनुसार भारी वर्षाका कारण बागमती, विष्णुमती, धोवीखोला, मनोहरालगायतका नदीहरूमा जल सतह खतराको तहमा पुगेको छ ।

नदीहरू उर्लेपछि बाढी बस्तीमा पस्न थालेको छ । काठमाडौंको कपनमा खहरे पस्दा बस्तीका घरहरू डुबानमा परेका छन् । धोबीखोलामा पनि जल सतह बढेर बाढी बस्तीमा पस्न थालेको छ ।

उपत्यका कोरिडोरका नदीनालाहरूमा जल सतह खतराको तह पुगेकाले नदीतटीय क्षेत्रहरूमा रहनेहरू र नदी किनारको सडकबाट यात्रा गर्नेहरूले दिउँसोसम्म उच्च सतर्कता अपनाउन बाढीविद्ले चेतावनी दिएका छन् ।