काठमाडौँ । काठमाडौं महानगरपालिकामा सञ्चालित निजी विद्यालयहरु यतिबेला तनावमा छन् । शिक्षा ऐनमा उल्लेखित प्रावधान एकातिर छोडेर विगतमा मन लागि कमाई गरिरहेका निजी विद्यालयहरु अहिले ऐन कार्यान्वयनमा काठमाडौं महानगरपालिका दृढ भएर लागे पछि तनावमा परेका हुन् ।

महानगरपालिकाको सुधारको लागि सक्रिय काठमाडौं महानगपालिकाका मेयर बालेन्द्र शाहले नियम कानूनको कार्यान्वयनमा समेत यतिबेला कडाई गरिरहेका छन् । बालेनको यो कदमको असर निजी विद्यालयहरुलाई समेत परेको छ । कर्मचारीसँगको मिलेमतोमा कागजी प्रक्रिया मिलाएर ऐनमा व्यवस्था भए अनुसारको छात्रवृत्ति गायब बनाउने कतिपय निजी विद्यालयका लागि काठमाडौँ महानगरको पछिल्लो निर्देशन टाउको दुखाईको विषय बनेको छ ।

महानगरपालिकाले बुधबार एक निर्देशन जारी गर्दै जेठ १५ गतेभित्र छात्रवृत्ति वितरण गरिसक्न निजी विद्यालयहरूलाई निर्देशन दिएको छ । त्यसको जानकारी जेठ १६ गते इमेलमार्फत काठमाडौँ महानगरपालिकाको शिक्षा विभागमा पठाउन भनेको छ । २०८० का लागि सम्बन्धित निजी विद्यालयबाट कक्षा १० सम्मका विद्यार्थीलाई वितरण गरिने छात्रवृत्तिको विवरण पेस गर्न भनेको हो ।
निजी विद्यालयले अघिल्लो शैक्षिक सत्रमा जम्मा विद्यार्थीको १० प्रतिशत विद्यार्थीलाई नयाँ शैक्षिक सत्रमा छात्रवृत्ति प्रदान गर्नुपर्ने कानुनी व्यवस्था छ । सोही आधारमा काठमाडौँ महानगरपालिका शिक्षा ऐन, २०७५ को दफा ५० को उपदफा (३) बमोजिमको छात्रवृत्ति छनोट समितिबाट निर्णय गराई छात्रवृत्ति वितरण गर्न भनेको छ ।
त्यसरी प्रदान गरेको छात्रवृत्तिको विवरण विद्यालयले आफ्नो वेबसाइटमा प्रकाशन गर्न समेत महानगरले भनेको छ । कुनै पनि अभिभावक, विद्यार्थी तथा सरोकारवालाको गुनासो भएमा सोको सुनुवाइको अवसर समेत प्रदान गर्न भनेको छ । त्यस्तै तोकिएको बमोजिमको समयमा छात्रवृत्ति वितरण नगर्ने विद्यालयको विवरण सार्वजनिक गर्ने समेत महानगरले चेतावनी दिएको छ । यसका लागि वडाध्यक्ष तथा जनप्रतिनिधिहरूलाई सहयोग तथा अनुगमन गर्न अनुरोध गरेको छ ।