काठमाडौं । नेपाली कांग्र्रेस पाँचथर–काठमाडौं सम्पर्क समितिको सभापतिमा लक्ष्मीनारायण तिमिल्सिना निर्विरोध निर्वाचित भएका छन् । २०८० वैशाख १६ गते शनिबार काठमाडौंमा भएको अधिवेशनले उनको नेतृत्वमा नयाँ कार्यसमिति बनेको हो ।
समितिको उपाध्यक्षमा धनेन्द्रराज आङदेम्बे, राजेन्द्र सम्बाहाम्फे र महिला उपाध्यक्षमा गोमादेवी आङदेम्बे र उपाध्यक्षमा निर्वाचित भएका छन् । यसैगरी सचिवद्वयमा जीवन ढुंगेल र टीका अधिकारी, सह–सचिवद्वयमा अनिल सेलिङ र छत्र बहादुर भण्डारी र कोषाध्यक्षमा पुनम फागो निर्वाचित भएका छन् । समितिका सदस्यहरुमा मुना आङ्देम्बे, शशिकला आङदेम्बे, इन्द्रमाया आङदेम्बे, दिनेश जवेगु, पदम मैनाली, महेन्द्र खनाल, विराज बास्कोटा, मनिषा प्याकुरेल, अम्बिका खनाल, युनिसा प्याकुरेल, सीता गौतम, नरेश रिजाल, वीरेन्द्र दाहाल, सुरेश माङ्यु र मदन वेघा निर्वाचित भएका छन् । नवगठित कार्यसमितिलाई निवर्तमान सभापति नीर्मल रिजालले पद तथा कार्यभार हस्तान्तरण गरे । नयाँ समितिलाई बधाई दिँदै उनले पार्टीको नीति र निर्देशन पालना गर्दै पार्टी र पाँचथरबासीको हितमा काम गर्न आग्रह गरे । रिजालले हिजो जस्तोसुकै असहज परिस्थितिमा पनि सम्पर्क समितिले जिल्लाबासी र काठमाडौंमा बसोबास गर्ने जिल्लाका नागरिकका लागि सक्दो सहयोग गरेको जनाए । उनले हिजोका राम्रा कामलाई निरन्तरता दिनसमेत नयाँ समितिलाई आग्रह गरे ।
नवनिर्वाचित सभापति लक्ष्मीनारायण तिमिल्सिनाले सम्पूर्णमा धन्यवाद ज्ञापन गर्दै पार्टीको नीति, नियम र पार्टीको हितभन्दा एक इन्च पनि दाँयाबाँया नगर्ने प्रतिबद्धता व्यक्त गरे । तिमिल्सिना निवर्तमान सचिव पनि हुन् । पार्टीका कोशी प्रदेश कार्य समितिका सदस्य टेकबहादुर काम्बाङको प्रमुख आतिथ्यतामा सम्पन्न अधिवेशनबाट निर्वाचित समितिको कार्यकाल २ वर्षको रहेको छ ।