गणेश जि.सी.
काठमाडौं । राष्ट्रपति चयनको विषयलाई लिएर माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्ड र एमाले अध्यक्ष खड्ग प्रसाद ओलीबीच सहमति जुट्न सकेको छैन । यी दुबै नेताहरुले सुदूरपश्चिम प्रदेशको एमाले नेतृत्वको सरकार जोगाउन र रास्वपालाई सरकारमा ल्याउन असफल बनेका छन् । यी दुबै नेताहरुको सम्बन्ध जति घाम तापेपनि न्यानो हुनुको सट्टा चिसो हुँदै गएको छ ।

सत्ता सहकार्यका दुई शीर्ष नेताले दर्जन पटक भन्दा बढी वार्ता गरिसकेका छन् तर हात लाग्यो शुन्य जस्तै भएको छ । आगामी फागुन २५ गते हुने राष्ट्रपति निर्वाचनसम्म पुग्दा दाहाल र ओलीबीच चिसोपन उत्कर्षमा पुग्ने देखिएको छ । काँग्रेसले २६ पुसमा प्रधानमन्त्री पुष्पकमल दाहाललाई विश्वासको मत दिएपछि १० पुस २०७९ मा भएको भागवण्डाको सहमति प्रभावित हुने देखिएको छ ।

सात दलीय गठबन्धनको भागवण्डामा राष्ट्रपति र सभामुख एमालेले लिने मौखिक समझदारी भएको बताइएको थियो । जसअनुसार प्रधानमन्त्री र सभामुखमा भागवण्डाको सहमति कार्यान्वयन भएको छ भने राष्ट्रपतिमा हलो अड्किने संभावना बढेको छ । एमाले सहमति अनुसार राष्ट्रपति पाउनु पर्ने दावीमा छ भने माओवादीले काँग्रेसले विश्वासको मत दिएपछि फेरिएको परिस्थितिमा राष्ट्रिय सहमति खोज्नुपर्ने भन्दै काँग्रेसतिर ढल्केको अवस्था छ ।

एमालेलाई सहजै राष्ट्रपति दिने पक्षमा माओवादी देखिन्न । सभामुख र राष्ट्रपति एमालेलाई दिँदा आफू कर्नरमा पर्ने चिन्ता प्रधानमन्त्री दाहालमा छ । त्यसैले काँग्रेसको राष्ट्रपति, माओवादीको प्रधानमन्त्री र एमालेको सभामुख हुँदा शक्ति सन्तुलन मिल्ने ठहर माओवादी केन्द्रको छ । एमाले अध्यक्ष ओलीले सुवास नेम्वाङ, अष्टलक्ष्मी शाक्य र ईश्वर पोखरेललाई राष्ट्रपति नबनाएर आफ्नो मुठ्ठीको व्यक्तिलाई बनाउन चाहन्छन् । आफूले भनेको व्यक्तिमा सहमति नहुने स्थितिमा एमाले गठबन्धनबाट फिर्ता हुने अवस्था आउँछ । हाल एमालेले चारवटा प्रदेशहरु मध्ये प्रदेश १, गण्डकी र लुम्बिनी गरी तिनवटा मुख्यमन्त्री, मन्त्रीहरु, संघमा सभामुख र मन्त्रीहरु बनाएर सत्ताको स्वाद लिइरहेको छ । एमालेबाट उपप्रधानसहित अर्थ, रक्षा, कृषि, भुमी व्यवस्थापन, गरिबी निवारण तथा सहकारी, स्वास्थ्य तथा जनसंख्या र उद्योग बाणिज्य तथा आपूर्ति मन्त्री बनेका छन् । यसरी सरकारमा एमालेकै हालीमुहाली चलेको अवस्थामा प्रधानमन्त्री दाहाल निरीह बन्न पुगेका छन् । राष्ट्रपति निर्वाचनमा माओवादी केन्द्रले राष्ट्रिय सहमतिलाई ध्यानमा राखेर काँग्रेसलाई सहयोग गरे वरिष्ठ नेता रामचन्द्र पौडेल र नेता कृष्ण प्रसाद सिटौला मध्ये १ जना राष्ट्रपति बन्नेछन् । राष्ट्रिय सहमति अहिलेको आवश्यकता पनि हो । गैरराजनीतिक व्यक्तिभन्दा राजनीतिक मान्छेमै सहमति हुनुपर्ने चर्चाले तरंग ल्याएको बेला माओवादी निर्णायक ठानिएको छ । (फोटो रातोपाटीबाट साभार)