काठमाडौं । पहिलो पटक मन्त्री भएका संस्कृति, पर्यटन तथा नागरिक उड्डयनमन्त्री सुदन किराँतीले भ्रष्टाचार र अनियमितता संलग्न कसैलाई पनि नछोड्ने चेतावनी दिएका छन् । त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुर शुक्रबार निलम्बनमा परेपछि उनले यस्तो प्रतिक्रिया दिएका हुन् । ठाकुर शुक्रबार निलम्वनमा परेका छन् ।

मन्त्रालयका प्रवक्ता राजेन्द्रकुमार केसीका अनुसार ठाकुरले थाई स्माइल एयरलाइन्सका प्रतिनिधिसँग गैरकानुनी लाभ लिने उद्देश्यले गरेको कुराकानीको श्रव्य सामग्री प्राप्त भएको छ । सोबारे जाँचबुझ गर्ने सिलसिलामा पदबाट निलम्बन गर्न नेपाल नागरिक उड्डयन प्राधिकरणका महाप्रबन्धकलाई लेखी पठाइएको केसीले बताए । यस विषयमा थप अनुसन्धान गर्न अख्तियार दुरुपयोग अनुसन्धान आयोगमा समेत पठाइने मन्त्रालयले जनाएको छ । ठाकुर पछिल्लो दुई वर्षयता विमानस्थलको प्रमुख पदमा थिए । यसअघि ९ माघमा त्रिभुवन विमानस्थलका आन्तरिक टर्मिनल प्रमुख पूर्ण चुँडाललाई पनि अख्तियार दुरुपयोग अनुसन्धान आयोगले स्रोत नखुलेको रकमसहित पक्राउ गरेको थियो ।

भोजपुरबाट प्रतिनिधिसभाको निर्वाचन जितेर मन्त्री भएका उनले आफ्नो मुख्य काम नै जनतालाई सेवा दिनु रहेको बताएका छन् । हिजो सांंसदमात्र हुँदा पनि सधैं जनताको पक्षमा बोल्ने उनले नेता, सांसद र मन्त्रीले जनताको हितलाई प्राथमिकतामा राख्नुपर्ने भन्दै आएका थिए । मन्त्री किराँती २४ दिनभित्रमा तीन पटक त्रिभुवन अन्तर्राष्ट्रिय विमानस्थलको अनुगमनमा पुगेका छन् । उनले गत बिहीबार पछिल्लो पटक अनुगमन गरे । उनी माघ २ गते मन्त्रीमा नियुक्त भएका थिए । उनले विमानस्थलको अवस्था अझै पनि चित्तबुझ्दो नभएको बताए । उनले पहिले जाँदा दिएको निर्देशन कार्यान्वयन भयो कि भएन भनेर अनुगमनमा फेरि गएको जनाएका छन् ।