काठमाडौं । पत्रकारिताबाट अचानक राजनीतिमा फड्को मारेका उपप्रधानमन्त्री तथा गृहमन्त्री रवि लामिछाने अहिले परीक्षणको घडीमा छन् । छोटो समयमा नै उच्चस्तरको राजनीतिक सफलता पाएका उनले अब आफ्नो लोकप्रियतालाई जोगाउन सक्छन् कि सक्दैनन् भन्ने विषय अहिले वहसमा छ ।

लामिछाने राष्ट्रिय स्वतन्त्र पार्टी (रास्वपा) का अध्यक्ष हुन् । उनले चितवनको क्षेत्र नम्बर २ बाट प्रतिनिधिसभाको निर्वाचन जितेका हुन् । अरु पुराना राजनीतिक दलसँग प्रतिस्पर्धा गरेर अत्यन्तै फराकिलो मतान्तरले जितेका उनको चुलिएको उचाई अझै पनि बढ्दैछ । उनले गत सोमबार उपप्रधानमन्त्री तथा गृहमन्त्रीको शपथ खाएपछि केही राम्रो कामको थालनी गरेका छन् । पदभार ग्रहण गर्दा र पत्रकारसँग कुरा गर्दा पनि नरम ढंगले प्रस्तुत भएका उनीप्रति आम मानिसको राम्रो अपेक्षा पनि छ । उनी सधैं मन्त्रालयको काममा खटिने र जनतालाई गुणस्तरीय सेवा दिने भन्दै आएका छन् । उनलाई सफल हुन प्रधानमन्त्री वा सत्ता साझेदार अन्य दलले कति समर्थन गर्छन् कि उनको लोकप्रियता बढेपछि अरुको असहयोग रहन्छ भन्ने हेर्न बाँकी नै छ । उनले राम्रो काम गरे भनें आगामी जुनसुकै निर्वाचनमा रास्वपाको राम्रो स्थान आउने भएकाले उनी केही गरेर लोकप्रिय हुने दाउमा छन् । धेरैले राज्य संयन्त्र नै प्रदुषित भएकाले रविलाई पनि केही गरेर देखाउन गाह्रो छ भनिरहेका बेला उनले त्यो गलत प्रकारको संयन्त्र परिवर्तन गर्न सक्ने सम्भावना पनि प्रशस्तै छ ।

रविले शपथ लिएकै दिन कञ्चनपुरमा बलत्कारपछि हत्या गरिएकी निर्मला पन्तलाई न्याया दिने बताएका थिए । उनले आफ्नो योजनालाई सार्थक पार्ने प्रयास गरिरहेका छन् । गृहमन्त्रीको निर्णय कार्यान्वयनका क्रममा प्रहरी प्रधान कार्यालय, नक्सालले केन्द्रीय अनुसन्धान ब्यूरो (सीआईबी) की प्रहरी नायब महानिरीक्षक (डीआईजी) दुर्गा सिंहको नेतृत्वमा पाँच सदस्यीय छानबिन समिति गठन गरेको छ । समितिमा ब्यूरोका प्रहरी उपरीक्षक (एसपी) कमल थापा, प्रहरी निरीक्षक (इन्स्पेक्टर) धिरेन्द्र रोकाया, मनोचिकित्सकसहितका सदस्यहरु छन् । उनीहरुलाई निर्मला प्रकरणको अनुसन्धान नयाँ शिराबाट गर्न कार्यादेश दिइएको प्रहरी उच्च स्रोतले बतायो । सिंह प्रहरी उपरीक्षक (एसपी) हुँदा पनि कञ्चनपुर पुगेर निर्मला हत्या प्रकरणको अनुसन्धानमा खटिएकी थिइन् । अन्य सदस्यहरु पनि यसअघि घटनाको अनुसन्धानमा संलग्न अधिकृतहरु हुन् । १० साउन २०७५ साल साउन १० गते कञ्चनपुरको भीमदत्त नगरपालिका २, उल्टाखामकी १३ वर्षीया बालिका निर्मला पन्तको शव भेटिएको थियो । कक्षा ९ मा पढ्ने बालिका निर्मलाको बलात्कारपछि हत्या भएको अनुसन्धानबाट देखिएको थियो । प्रहरीले घटनाको २५ दिनपछि मुख्य आरोपीका रुपमा स्थानीय दिलीपसिंह विष्टलाई सार्वजनिक गरेको थियो तर स्थानीयले उनी मानिसक रोगी भएको दाबीसहित घटनामा संलग्न हुन नसक्ने बताउँदै आन्दोलन चर्काएका थिए । त्यसक्रममा प्रहरीको गोली लागेर एकजनाको मृत्यु पनि भयो । तत्कालीन अनुसन्धान अधिकृतहरुले निर्मलाको ‘भजाइनल स्वाब’ प्रहरीको केन्द्रीय विधि विज्ञान प्रयोगशालामा पठाएका थिए । त्यसबाट निकालिएको डीएनएसँग निर्मलाको डीएनए म्याच नभएपछि २६ भदौमा उनी छुटेका थिए ।